दमक/ कृषकहरुलाई उद्यमशीलता तर्फ जोड दिने उद्देश्यले झापाको कमल गाउँँपालिकाले आइतबार कमल–६ स्थित नमुना कृषक समूहलाई हाते ट्याक्टर उपलब्ध गराएको छ ।
गाँउपालिका अन्तर्गतको कृषि विकास शाखाको ५० प्रतिशत अनुदानमा समूहलाई एक थान हाते ट्याक्टर प्रदान गरिएको हो । सो हाते ट्याक्टर कृषि विकास शाखाका प्रमुख दिलबहादुर श्रेष्ठले समूहका अध्यक्ष मेदनीप्रसाद पोख्रेललाई हस्तान्तरण गरे । हाते ट्याक्टर आइतबारदेखि नै प्रयोगमा समेत ल्याईएको अध्यक्ष पोख्रेलले बताए । समूहले दुई बर्ष यता त्यहाँ समूहगत विभिन्न आयमूलक कृषिबाली,खेती गरिआएको छ ।
गाउँपालिकाको कृषि विकास शाखाले गाउँँपालिका भित्रका उन्नत कृषक समूह,संस्थाहरुलाई विभिन्न कृषि औजार,उपकरणहरु अनुदानमा वितरण गर्दे आएको शाखा प्रमुख श्रेष्ठले बताए । यसवर्ष गाउँपालिकाले ५ वटा पावर टेलर, ८ वटा मिनी टेलर,१५ वटा घाँस काट्ने औजार,१० वटा मकै छडाउने औजार ,५ वटा दुध संकलन गर्ने चिस्यान औजारहरु वितरण गरिएको जनाएको छ ।
कृषक समूहलाई हाते ट्याक्टर
संगमले खोल्यो उर्लावारीमा शाखा
उर्लावारी/ पूर्वकै ब्राण्डको रुपमा स्थापित बनेको संगम स्वीट्सले मोरंगको उर्लाबारीमा पनि आफ्नो शाखा सञ्चालनमा ल्याएको छ । रामनवमीको अवसर पारेर आइतवारदेखि आफ्नो छैठौ शाखाको रुपमा उर्लाबारी बजारमा नै सेवा शुरु गरेको हो । यसको उद्घाटन उर्लाबारीका सरकार प्रमुख खड्ग फागोले गरे ।
उनले संगम स्वीट्सको खुलेर प्रशंशा पनि गरे । उनले आफू काठमण्डौमा जाँदा समेत संगम स्वीटस नै पुग्ने गरेको र दमकमा कयौ पटक गएको भन्दै आफ्नै नगरमा आएकेमा खुशी ब्यक्त गरे ।
संगम स्वीट्सका कार्यकारी प्रमुख संगम शर्माले गुणस्तरमा कुनै पनि कमी हुन नदिने र आफ्नो ब्राण्डलाइ उपभोक्तामाझ स्वस्थ रुपमा प्रस्तुत गर्ने बताए । उनले संगम स्वीट्स यहाँसम्म आइपुग्न धेरै मेहनत गरेको बताए ।
संगम स्वीटस दमकका सञ्चालक बिमल शर्माले ओपनिङको दिन सोचेभन्दा राम्रो जमघट रहेकोले ग्रहकको चाहना अनुसार सेवा दिन कोसिस गर्ने बताए ।
गुणस्तरीय पानी कसरी ?
रविकिरण आचार्य
पानी मानव जीवनको लागि महत्वपूर्ण आधारभूत आवश्यकता हो। पानीबिना जीवनको कल्पनासम्म गर्न सकिँदैन। पानी पर्याप्त हुँदैमा यसले मानिसको आवश्यकतालाई तात्कालिक रूपमा समाधान त गर्ला, तर अन्ततोगत्वा गुणस्तरहीनताको कारणले हैजा, टाइफाइड, आउँ, कमलपित्त जस्ता विभिन्न किसिमका पानीजन्य रोगको उत्पत्ति गराई मानव जीवनलाई जटिल र तहसनहस बनाइदिन्छ। त्यसैले पिउने पानी गुणस्तरीय र शुद्ध हुनुपर्छ।
राष्ट्रिय खानेपानी गुणस्तर मापदण्ड २०६२ अनुसार हामीलाई आवश्यक पर्ने रासायनिक तत्वहरू ठीक–ठीक मात्रामा भएको तथा कुनै पनि प्रकारका ब्याक्टेरिया, भाइरस र अन्य परजीवीरहित भौतिक अवस्थासमेत ठीक रहेको पानी नै गुणस्तरीय पानी हो। हामीले मूलतः तीन किसिमबाट पानी प्राप्त गर्दछौं।
सतहको पानीअन्तर्गत नदी, खोला, मूल, खोल्सा, ताल, पोखरी आदि स्रोतमा पाइने पानी हो। नेपालको सन्दर्भमा हामीले यी सबै प्रकारका स्रोतबाट पिउने प्रयोजनका लागि पानी प्रयोग गरिरहेका छौं। त्यसैगरी ह्यान्डपम्प, सेलो टयुबवेल, बोरिङ जस्ता भूमिगत पानीको प्रयोग पनि उत्तिकै गरिरहेका छौं। यसका अतिरिक्त आकाशको पानीलाई पनि कतिपय अवस्था र ठाउँअनुसार प्रयोग गरिएको पाइन्छ। यसरी जुनसुकै स्रोतसाधनबाट पानीको उपयोग गरे पनि ती कुनै न कुनै किसिमले प्रदूषित भएको पाइन्छ। खासगरी हामीले पिउने पानी निम्नअनुसार प्रदूषित हुने गर्छ।
१. उद्योगजन्य स्रोतहरू
यसअन्तर्गत उद्योग सञ्चालनका क्रममा उपउत्पादकको रूपमा निस्कने जैविक, अजैविकलगायत विभिन्न किसिमका विषादी पानीका स्रोतमा मिसाइदिँदा पानी प्रदूषित हुने देखिन्छ।
२. घरायसी स्रोतहरू ः यसअन्तर्गत विभिन्न घरायसी क्रियाकलापबाट उत्पन्न हुने फोहरपानी, साबुन तथा डिटर्जेन्टयुक्त पानी कुनै पनि किसिमले पानीको स्रोतमा मिसिँदा पानी प्रदूषित हुने गर्छ।
३. कृषिजन्य स्रोत ः हामीले उपयोग गर्ने विभिन्न खाद्यान्न बालीको उत्पादन क्षमता अभिवृद्धि गर्नका लागि थरीथरीका कीटनाशक औषधि, फन्जिसाइडहरूका अतिरिक्त डीएपी, युरिया जस्ता रासायनिक मलको अधिकतम प्रयोगका कारण ती सबैका अवशेष पानीको स्रोतहरूमा मिसिँदा पानी प्रदूषित हुन्छ।
४. पेटोलियम पदार्थ डिजेल इत्यादि ः पेट्रोल, डिजेलजस्ता हाइडोकार्बन यौगिकहरूको चुहावट तथा तिनीहरूको जलनबाट उत्पन्न हुने विषालु ग्याँस विभिन्न माध्यमबाट पानीमा मिसिन जाँदा पानी प्रदूषित हुने देखिन्छ।
५. ढल व्यवस्थापन ः हाम्रोजस्तो अल्पविकसित देशका सबै ठाउँमा ढल प्रणालीको समुचित व्यवस्थापन नहुँदा र खानेपानी वितरण प्रणाली तथा ढल निष्कासन प्रणाली एवं सडक सम्भार प्रणाली परस्परमा जोडिएर जाँदा चुहावट भई पानीमा मिसिँदा प्रदूषण भएको देखिन्छ। यसका अतिरिक्त खानेपानी वितरण प्रणालीमा प्रयोग हुने कमसल किसिमका पाइपमा छिटो खिया लाग्ने हुँदा पानी प्रदूषित हुने देखिन्छ।
६. प्राकृतिक रूपमा पाइने विभिन्न तत्वहरूको मिसावट ः भौगर्भिक विचलन हुँदा पृथ्वीमा विद्यमान कपर, साइनाइड, लिड, सल्फाइड, सल्फेट, क्याडमिएम, मर्करीजस्ता हानिकारक तत्वहरूको अति संघन भई पानीका स्रोतमा मिसिँदा प्रदूषित हुने देखिन्छ।
पानी प्रदूषित हुनबाट जोगाउने उपाय सामान्यतया पानी र यसका स्रोत मानवीय क्रियकलापबाट प्रदूषित हुने हुँदा स्वयं मानिसहरू सचेत भएर पानीका स्रोत प्रदूषित हुनबाट जोगाउन उत्पे्ररित हुनुपर्छ। यसका लागि निम्नअनुसार गर्दा पानी प्रदूषण हुनबाट जोगाउन सकिन्छ–
१. उद्योगबाट निस्कने विभिन्न जैविक, अजैविक एवं अन्य विषादीयुक्त पानीलाई पिउने पानीको स्रोतमा नमिसाई त्यसको उपचार गरेर मात्र व्यवस्थितरूपमा विर्सजन गर्नुपर्ने देखिन्छ।
२. घरायसी क्रियाकलापबाट उत्पादन भएका फोहर र फोहर पानीलाई पिउने पानीका स्रोतमा नमिसाई उचित तरिकाले व्यवस्थापन गर्न सके मात्र पानी प्रदूषण हुनबाट रोक्न सकिन्छ।
३. कृषि उत्पादनका लागि प्रयोग गरिने विषादी एवं रासायनिक मलको सीमित प्रयोग एवं प्रयोगपछि त्यसको अवशेषलाई निस्तेज पारी पानीको स्रोतमा पहुँच नदिई पानी प्रदूषण हुनबाट रोक्न सकिन्छ।
४. विद्यमान डिजेल पेट्रोलयुक्त गाडीको साटो ब्याट्री एवं सोलार पावरबाट चल्न सक्ने भेहिकलको व्यवस्थापन गर्न सके मात्र त्यसबाट पानीमा हुन सक्ने प्रदूषण रोक्न सकिन्छ।
५. खानेपानी वितरण प्रणालीका पाइपहरू गुणस्तरीय हुनुपर्ने साथै खानेपानी, ढल, विद्युत एवं सडक विस्तारका कार्यक्रम समन्वयात्मक तरिकाले गर्न सके मात्र पानीको स्रोत प्रदूषित हुनबाट रोक्न सकिन्छ।
अन्त्यमा, विभिन्न किसिमका सावधानी अपनाउँदा—अपनाउँदै पनि हामीले पिउने पानी प्रदूषित हुन सक्ने हुँदा हिउँद र बर्खा गरी कम्तीमा पनि वर्षको दुईपटक पानीको नमुना परीक्षण गराई पानीको प्रयोग गर्दा राम्रो हुन्छ। यसका लागि नजिकैको पानी परीक्षण प्रयोगशालामा गई पानी परीक्षण गराउनुपर्छ। पानीमा कोलिफर्म ब्याक्टेरिया पाइएमा पिउने पानीलाई राम्रोसँग उमाली अथवा क्लोरिनको झोल उपर्युक्त मात्रामा मिलाई प्रयोग गर्नुपर्छ। रासायनिक तत्व राष्ट्रिय खानेपानी गुणस्तर मापदण्डअनुसार नपाइएमा पानीलाई विभिन्न तरिकाले शुद्धीकरण गर्नुपर्ने हुन्छ। घरायसी फिल्टरदेखि बजारमा पाइने फिल्टरहरूसमेत प्रयोग गर्न सकिन्छ।
—आचार्य खानेपानी तथा ढल निकास विभागका रसायनशास्त्री हुन्।
झापामा ३ सय ३४ जना नयाँ क्षयरोगी
झापा/ झापामा फेला परेका छन् । चालू आर्थिक वर्षको पहिला चौमासिकको अवधिमा जिल्लामा ९४ जना महिला र २ सय ४० पुरुषगरी ३ सय ३४ जना नयाँ क्षयरोगी फेला परेको जिल्ला जनस्वाथ्य कार्यालय झापाका क्षयकुष्ठ अधिकृत प्रमोद दाहालले जानकारी दिए ।
उनका अनुसार जिल्लाका बढी प्रभावित १० स्थानमध्ये दमक सबैभन्दा धेरै ५० जना (महिला १७, पुरुष ३३) र तोपगाछीमा सबैभन्दा कम ८ जना (महिला २, पुरुष ६) क्षयरोगी फेला परेका छन् ।
त्यस्तै, शनिश्चरेमा ३६ जना (महिला १६, पुरुष २०), बिर्तामोडमा २२ जना (महिला ६, पुरुष १६), काँकरभिट्टामा १७ जना (महिला ६, पुरुष ११), सुरुङ्गा १६ जना (महिला ३ जना, १३ पुरुष), सतासीधाममा १५ जना (महिला ५, पुरुष १०), भद्रपुर ११ जना (महिला २, पुरुष ९) पुरुष र लखनपुर १० जना (महिला ३, पुरुष ७) नयाँ क्षयरोगी फेला परेका छन् । बाँकी छिटपुट रुपमा जिल्लाका विभिन्न स्थानमा क्षयरोगी फेला परेको कार्यालयले जनाएको छ ।
जिल्लामा आव २०७२÷०७३ मा १ हजार ८६ जना (महिला ३८० र पुरुष ७०६) र आव ०७३÷०७४ मा १ हजार ७० जना (महिला ३७६ र ६९४ पुरुष) मा क्षयरोगी फेला परेको कार्यालयको तथ्यांकमा उल्लेख छ ।
जिल्ला जनस्वास्थ्यले विराट नेपाल मेडिकल ट्रष्ट सहयोगमा जिल्लामा क्षयरोग निवारणका लागि विभिन्न कार्यक्रम समेत सञ्चालन गर्दै आएको दाहालले बताए । ट्रष्टको सहयोगमा ल्याबको सुविधा नभएको स्थानबाट खकार संकलन गरेर ल्याबसम्म पुर्याउने र रोगी परिवारका सबै सदस्यको खकार परीक्षण गर्ने गरिएको छ ।
हाल जिल्लाका ५३ वटा स्वास्थ्य संस्थाबाट क्षयरोगीलाई निःशुल्क औषधि वितरण गरिँदै आएको छ भने १८ वटा स्वास्थ्य संस्थाबाट निःशुल्क खकार परीक्षण हुँदै आएको छ ।
क्षयरोगीलाई डट्स प्रविधिबाट (स्वाथ्यकर्मीको प्रत्यक्ष निगरानीमा) उपचार गरिँदै आएको छ । पहिलो चरणको नयाँ बिरामीलाई ६ महिना र औषधि अनियमित भएका र रोग बल्झिएका बिरामीलाई ८ महिना औषधि सेवन गराएर उपचार गरिँदै आएको छ ।
झापामा गत वर्ष ९ जनाको क्षयरोगका कारण मृत्यु भएको कार्यालयले जनाएको छ । ‘विश्वमा बर्सेनि साढेसात लाख मानिसको मृत्यु हुने गरेको छ’, जिल्ला जनस्वास्थ्य प्रमुख मधुसूधन कोइरालाले भने, ‘रोगका कारण बिरामीको मृत्यु हुने रोगमध्ये क्षयरोग नवौँ स्थानमा पर्छ ।’
झापामा क्षयरोगी पत्ता लगाउने कार्यमा ६० प्रतिशतमात्र लक्ष्य हासिल हुने गरेको अधिकृत दाहालले बताए । ‘१५–४९ वर्ष उमेर समूहका बिरामीको संख्या बढी छ’, उनले भने, ‘झापामा भेटिएका क्षयरोगीमध्ये ९२ प्रतिशतको सफल उपचार भएको छ ।’
नेपालमा कूल जनसंख्याको ४५ प्रतिशत मानिस क्षयरोगको जोखिममा रहेका छन् । बर्सेनि ४० हजार मानिसमा क्षयरोगको संक्रमण हुने गरेको छ भने २० हजार जनालाई क्षयरोग लाग्ने गरेको कार्यालयले जनाएको छ । जसमध्ये ५ देखि ७ हजार जनाको मृत्यु हुने गरेको तथ्यांक छ । विश्वभरको तथ्यांक हेर्ने हो भने प्रतिदिन ४ हजार मानिसले क्षयरोगका कारण मृत्युवरण गरिरहेका छन् ।
सरकारले सन् २०५० सम्ममा मुलुकमा प्रतिलाख जनसंख्यामा १ भन्दा कम क्षयरोग संख्या बनाउने लक्ष्य लिएको छ । क्षयरोग अतिप्रभावित २२ वटा जिल्लामध्ये झापा छैठौँ स्थानमा रहेको कार्यालयले जनाएको छ ।
गौरादहमा निशुल्क स्वास्थ्य शिविर
गौरादह/ वि.पी. कोइराला स्वास्थ्य विज्ञान प्रतिष्ठान धरानको प्राविधिक सहयोगमा एक दिने निशुल्क वृहत स्वास्थ्य शिविर सम्पन्न भएको छ । गौरादह वार्ड नं. २ स्थित अमर आधारभुत विद्यालयमा भएको कार्यक्रममा धरान घोपाबाट आएका वरिष्ठ विषेशज्ञ डाक्टरहरुको टोली द्धारा नाक, कान, घाटी सम्वन्धि रोगहरुको निशुल्क स्वास्थ्य परिक्षण गरि आवश्यक औषधी समेत निशुल्क रुपमा प्रदान गरिएको थियो ।
निशुल्क स्वास्थ्य शिविरमा प्राध्यापक डा. बजरंग प्रसाद साह, प्राध्यापक डा. दिपक पौडेल, एम.एस. डा. सुवन भण्डारी, एम.एस. डा. अनुप सन्जेल तथा अडियोलोजिस्ट गोपाल सुवेदी सहितको विषेशज्ञ टोलीद्धारा ३२५ वढि बिभिन्न विरामीहरुको स्वास्थ्य परिक्षण गरिएको थियो । औपचारिक रुपमा सञ्चालित कार्यक्रमको उद्देश्यवारे प्रकाश पार्दै नगर स्वास्थ्य संयोजक पर्शुराम भट्टराईले नगरपालिकाले आयोजना गरेको स्वास्थ्य कार्यक्रमले आर्थिकरुपमा नाक, कान, घाँटी सम्वन्धी समस्यामा रहेका विरामीहरुकोलागी अमुल्य योगदान पुर्याउन सकेको बताउँदै आगामी दिनमा जन–स्वास्थ्यको क्षेत्रमा अझ वढी जिम्मेवारी वहन गर्दै अगाडि वढिने बताए ।
कार्यक्रममा आप्mना धारणा राख्दै नगर उप–प्रमुख गिता भेट्वालले स्वास्थ्य क्षेत्रमा वृहत सुधार ल्याउकालागि नगरका आगामी योजनाहरुको बारेमा चर्चा गरेकी थिइन । कार्यक्रमा वोल्दै नगरप्रमुख रोहित कुमार साहले गौरादहमा निकट भविष्यमानै एउटा सुविधा सम्पन्न हस्पिटल निर्माण गरिने बताउदै स्वास्थ्य क्षेत्रमा ठोस कार्यक्रम ल्याएरै छाड्ने प्रतिवद्धता व्यक्त गरे । “म आप्m स्वयम् स्वास्थ्यकर्मी भएकोले नगरवासीलाई भरपर्दो स्वास्थ्य सुविधा प्रदान गरिनु पर्छ भन्ने मेरो चाहना छ, चालु आर्थिक वर्षमा हामिले जे–जति बजेट स्वास्थ्य क्षेत्रमा छुट्याउन सकेका र्छौ, आगामी जेष्ठमा आउने वजेट बाट ठोस कार्यक्रमहरु अगाडि वढाइने छ ”— साहले भने ।
नगरपालिका द्धारा आयोजना गरिएको नाक, कान, घाटी सम्वधी निशुल्क स्वास्थ्य शिविरमा चेक जाँच गराउन आएका स्थानीयवासीमा निकै उत्सुकता रहेको पाइयो– समाजसेवी युवा धर्मराज गुरागाँईले बताए ।
अब नयाँ नेपालमा, नयाँ संरचना र प्रद्धतिबाट शिक्षा क्षेत्रलाई अघि बढाइने
उर्लाबारी/ प्रदेश १ का मुख्यमन्त्री शेरधन राईले अब शिक्षा क्षेत्रले आर्थिक अभाव झेल्नु नपर्ने बताएका छन् । उनले प्रदेश सरकार आर्थिक अभाव खेप्दै आएका सामुदायिक विद्यालय र क्याम्पसको स्तर वृद्धिका लागि लागेको बताए ।
शनिबार मोरङको उर्लाबारी नगरपालिकास्थित उर्लाबारी बहुमुखी क्याम्पसको १८ औं क्याम्पस सभा तथा ३० औं वार्षिकोत्सव समारोहमा मुख्यमन्त्री राईले शिक्षा क्षेत्रमा देखिएका सबै समस्या समाधानका लागि प्रदेश सरकार नीति निर्माणमा जुटेको बताए । ‘नीति, बजेट तथा कार्यक्रम नभएर शिक्षण संस्था नचल्ने अवस्था विगत भइसक्यो। अब नयाँ नेपालमा, नयाँ संरचना र प्रद्धतिबाट शिक्षा क्षेत्रलाई अघि बढाइने छ । त्यसका लागि आवश्यक कानुनहरुको निर्माण भइरहेको छ,’ उनले भने ।
मुख्यमन्त्री राईले जनताले प्रत्यक्ष अनुभव गर्ने खालको वैज्ञानिक, आधुनिक, प्राविधिक एवं व्यवहारिक शिक्षाको विकास गर्नुको विकल्प नरहेको औंल्याए । प्रदेश १ सबै कुराले सम्पन्न रहेको बताउँदै त्यसलाई जनताको पहुँचसम्म पुर्याउँने बाटोमा प्रदेश सरकार अघि बढ्ने बताए । ‘यो प्रदेश जल, चिया, लालीगुराँस र धान उत्पादनको राजधानी हो। अब, शिक्षामा पनि मुलुकको अग्रणी बनाउन लाग्नुपर्छ,’ उनले भने। भारत र चीनसंग मात्र नभई भुटान र बंगलादेशसंग पनि नजिक रहेकोले प्रदेश १ ले त्यसको पनि फाइदा उठाउनुपर्ने मुख्यमन्त्री राईले बताए ।
स्वर्णलक्ष्मीको बार्षिकोत्सव सम्पन्न
दमक/ झापाको दमक– ८ स्थित स्वर्णलक्ष्मी बचत तथा ऋण सहकारी संस्थाले शनिवार विभिन्न कार्यक्रमगरि आफनो ९ औ स्थापना दिवस मनाएको छ ।
स्थापना दिवसको अवसरमा रक्तदान, निःशुल्क स्वास्थ्य चेकजाँच तथा ल्याब परिक्षण गर्नुका साथै रेडक्रसको रक्तसञ्चार सेवा केन्द्रलाई २ थान रक्तदानमा प्रयोग गरिने बेड हस्तान्तरण गरिएको संस्थाले जनाएको छ । संस्थाको प्राङगणमा आयोजित बृहत शिविरमा आँखा, दन्त, महिला तथा प्रसुति, सुगर, प्रेसर, मुटु सम्बन्धी सर्वसाधारणहरुले स्वास्थ्य जाँच गराएका थिए ।
संस्थाका व्यवस्थापक कमल घिमीरेका अनुसार खुल्ला रक्तदानमा १०१ पिन्ट रगत संकलन भएको छ । रक्तदानमा संस्थाका सञ्चालक, शेयर सदस्य,कर्मचारी तथा सर्वसाधारणहरुले रगत दिएका थिए । त्यस्तै शिविरमा आयोजित आखाँ स्वास्थ्य परिक्षण तर्फ १ सय ४४ र दन्त तर्फ ४१ जनाको परिक्षण गरिएको थियो । त्यस्तै १ सय ३० जनाले फिजिसियन डाक्टरको सेवा लिएका थिए भने ३ सय २३ जनाले स्वास्थ्य जाँच पछि विभिन्न रोगको ल्याव परिक्षण गरिएको थियो । उनीहरुलाई औषधी समेत निशुल्क वितरण गरिएको संस्थाका अध्यक्ष रवि न्यौपानेले जानकारी दिए ।
जिल्ला बचत तथा ऋण सहकारी संघका जिल्ला अध्भ्यक्ष घनश्याम अधिकारीको प्रमुख आतिथ्यतामा भएको सो कार्यक्रममा जिल्ला सहकारी संघ झापाका सदस्य प्रेम कोइराला, स्वयंमसेवी रक्तदाता समाज झापाका अध्यक्ष सिताराम खतिवडा, रेडक्रस सोसाईटी उपशाखा दमकका सदस्य तिर्थराज बस्नेत लगायतले शुभकामना मन्तब्य राखेका थिए । संस्थाका कोषाध्यक्ष बुद्धि सागर बरालले स्वागत मन्तव्य राखेका थिए । कार्यक्रममा संस्थाले स्वास्थ्य शिविरमा प्राविधिक सहयोग पुर्याँउने लाइफलाइन अस्पताल,हिमालय चश्मा घर, रेडक्रस दमक र पाथीभरा डेन्टल सेन्टरलाई सम्मान गरिएको थियो ।
संस्थाले बर्सेनी आफनो स्थापना दिवसका अवसर पारेर सामाजिक उत्तरदायित्व कार्यक्रमसंगै बृहत रक्तदान,स्वास्थ्य शिविरको आयोजना गरिआएको छ ।
राजेश मल्लिक हत्यामा संलग्न काका पक्राउ,
झापा,९ चैत/ एकै परिवारमा रहेका भतिजलाई छुरा प्रहार गरेर हत्या गर्ने काका पक्राउ परेका छन् । झापाको दमकमा चार महिना अघि एक जना युवाको हत्यामा संलग्न अभियुक्तलाई प्रहरीले सार्वजनिक गरेको हो ।
इलाका प्रहरी कार्यालय दमकले शुक्रवार यहाँ पत्रकार सम्मेलन गरि दमक–७ बस्ने हरिवहादुर मल्लिकका १९ बर्षीय छोरा राजेश मल्लिकको हत्यामा संलग्न सोहि वडा बस्ने २६ बर्षीय भोला भन्ने नरेश मल्लिकलाई सार्वजनिक गरेको हो । राजेशका परिवारसहित जनप्रतिनिधिहरुवीच प्रहरीले अभियुक्तलाई सार्वजनिक गर्दे प्रहरी नायव उपरिक्षक दिपक गिरीले दोषीलाई कानुन बमोजिम सजाय पाउने बताए ।
पक्राउ परेका मल्लिक एकाघरका काका भएको प्रहरीले जनाएको छ । उनलाई इप्रका दमकका प्रनाउ गिरीको नेतृत्वमा गएको टोलीले झापाको मेचीनगर–६ स्थित मेची खोलाका आसपासबाट शुक्रवार विहान ८.३० वजे पक्राउ गरेको हो । उनी हत्या लगत्तै मोरङको विराटनगर नाका हुदै भारत छिरेका थिए ।
दमकको हिमालय मावि कक्षा १२ मा अध्ययनरत राजेशको हत्या लगत्तै प्रहरीले सुक्ष्म ढंगले अनुसन्धान तीव्र वनाएको थियो । प्रहरीले अनुसन्धानका लागि विशेष व्यूरो प्रहरी निरीक्षक हेमराज ओलीको कमाण्डमा एक टोली परिचालित भएको थियो ।
प्रनाउ गिरीका अनुसार अभियुक्त पछि भारतको मात्तीगाढा आसपास बसेर परिवार भेट्न काकड्भिट्टा आसपास आउने गरेको पाईएको थियो । त्यही क्रममा उनलाई प्रहरीले नियन्त्रणमा लिएको प्रनाउ गिरीले बताए ।
प्रनाउ गिरीका अनुसार अभियुक्तलाई शुक्रवारनै जिल्ला अदालत झापामा म्याद थप गरि अनुसन्धान शुरु गरिएको छ । प्रहरी सामु अभियुक्तले राजेशको हत्या आफूलेनै गरेको बयानका क्रममा स्वीरकारेका प्रनाउ गिरीले बताए । यसैवीच अभियुक्त समातिए खबर लगत्तै प्रहरी कार्यालयमा दिनभरि सर्वसाधारणको ठुलो भिड लागेको थियो ।
अभियुक्तले आफनै भतिजलाई गत कातिक २५ गते दमक–६ स्थित त्रिवेणी होटल तथा लजमा छुरा प्रहार गरि हत्या गरेका थिए । हत्या पछि फरार भएका भोलाको खोजतलासका क्रममा पक्राउ गरिएको प्रनाउ गिरीले बताए ।
प्रदेश १ को प्रदेश सभा नियमावली पारित २ सय ११ नियम
विराटनगर/ प्रदेश १ को प्रदेशसभा नियमावली २०७४ बिहिबार पारित भएको छ । प्रदेशसभाको सातौं बैठकले २ सय ११ नियम र ७ अनुसूचि भएको नियमावली सर्वसम्मतीले पारित गरेको हो । प्रदेशसभा सदस्य लिलाबल्लभ अधिकारीको संयोजकत्वमा गठित ११ सदस्यीय नियमावली मस्यौदा समितिले तयार पारेको मस्यौदा संशोधनसहित पारित भएको हो ।
मस्यौदामाथि नेकपा एमालेकी सांसद उषाकला राईले शून्य समय र प्रश्नोत्तर समयको छुट्टाछुट्टै प्रावधानलाई एउटा मात्रै राख्न हालेको संशोधन प्रस्ताव सर्वसम्मतीले पारित भएको थियो ।
संशोधनपछि शून्य समय एक घण्टा ३० मिनेट कायम भएको छ । नियमावलीले विभिन्न सात वटा संसदीय समिति रहने व्यवस्था गरेको छ । नियमावली पारित गरेपछि आगामी चैत १४ गते दिउँसो १ बजे सम्मकालागि बैठक स्थगित भएको छ ।
ट्याक्टर दुर्घटनामा चालकको मृत्यु
फिदिम/ जिल्लाको फिदिम नगरपालिका–१, साब्राङमा शुक्रबार अपरान्ह भएको ट्याक्टर दुर्घटनामा चालक ठहरै भएका छन् ।
मृत्यु हुने चालक इलाम नगरपालिका–१०, गोदकका २१ बर्षिय खगेन्द्र खत्री रहेको प्रहरीले जनाएको छ । उनको सडक बीचमै ट्याक्टर पल्टिदा चेपिएर घटनास्थलमै मृत्यु भएको हो । ट्याक्टरमा उनी मात्र रहेका थिए । मे १ त २५२३ नम्बरको ट्याक्टर फिदिम–फालोट सडक खण्ड अन्तर्गत फिदिम–१, साब्राङमा सडकमै पल्टिएको थियो ।
उक्त ट्याक्टर एशियाली बिकास बैंकको सफ्ट ऋण सहयोगमा कालोपत्रेको काम सुरु भएको फिदिम–फालोट सडकमा ढुवानीको काममा प्रयोग भइरहेको थियो ।
ढुंगा ओसार्ने क्रममा दुर्घटनामा परेको जिल्ला प्रहरी कार्यालयका प्रवक्ता प्रहरी निरिक्षक बिज्ञान बस्नेतले बताए । घुम्तिको घेउमा पल्टिएकाले उक्त ट्याक्टर ओभर स्पिरिडका कारण अनियन्त्रित भई पल्टिन पुगेको प्रहरीको अनुमान छ ।
सडक बीचमै ट्याक्टर पल्टिएपछि केही समय फिदिम–फालोट सडक अवरुद्ध भएको थियो । साँढे तीन बजेतिर स्काभेटर प्रयोग गरी ट्याक्टर पन्छाएर सडक सूचारु गरिएको प्रहरीले जनाएको छ ।
