प्रदेश आवाज
दमक/ पूर्वका स्थापित र ठूला भनिएका नगरपालिकाहरूमा फोहोर टाउको दुःखाइको विषय बनेको छ । फोहोर व्यवस्थापनलाई नगरहरूले प्राथमिकता दिन त खोजेका छन् । तर, उनीहरू नगरलाई सफा राख्न सक्षम बनिसकेका छैनन् । दमकमा शहरीकरण बढेसँगै दैनिक उत्पादन हुने फोहोरकालागि स्थायी व्यवस्थापन हुन सकेको छैन । चारबर्ष अघि देखि फोहोरलाई डम्पिङ्ग साईडको व्यवस्थापन गरेर गाँड्ने कार्य गरे पनि बजारका अधिकांश क्षेत्रमा समयमा फोहोर उठाउन नसकेको नगरबासीले गुनासो गरेका छन् । दमकबाट मात्र दैनिक उत्पादन हुने १५ टन भन्दा धेरै फोहोरको अस्थायी व्यवस्थापन भए पनि कति स्थानका खाली नालाहरु फोहोरले भरिएका छन् ।
फोहोर प्रशोधन गर्ने उद्देश्यले १ करोड ५० लाख भन्दा धेरै रकम खर्च गरेर निर्माण गरेको भौतिक संरचना प्रयोगमा नआई पुरानो बन्दै गइरहेका छन् । दमक वडा नं. २ को उत्तरी क्षेत्र भूटानी शरणार्थी शिविर वेलडाँगी १ र चुलाचुलीको सिमानामा पर्ने कोलडाँडा नजिक रतुवा खोला किनारमा फोहोरलाई पुर्ने कार्य गर्दै आएको फोहोर संकलनमा जिम्मा लिएको संस्था पाथ ग्रीन लिङककी प्रवन्ध निर्देशक निर्मला चौधरीले बताइन् ।
चौधरीले नगरका नागरिक सचेत हुँदा हँुँदै पनि फोहोरको सही व्यस्थापन आफैले नगरेर फोहोरको उचित व्यवस्थापन नभएको बताए । सरसफाईमा खटेका ५२ जना कर्मचारीले विहानै फोहोर उठानउने र व्यवसायीले ढिलो फोहोर सडकमा ल्याउनाले यो समस्या भएको चौधरीले बताइन् ।
यता दमक नगरपालिकाका फोहोर व्यवस्थापन शाखाका प्रमुख नायव सुव्बा द्रोण थापाले फोहोर प्रशोधनको उचित व्यवस्थापन नगरे दमक मात्र नभएर दमक जस्ता धेरै शहरमा फोहोर एउटा ठूलो चुनौतीको रुपमा देखा पर्ने बताए । थापाले प्रशोधन संचलान गर्ने भनेर लागेको लामो समय भएकोले तत्काल यसको कार्य शुरुवाती गर्ने भनिए पनि आवश्यक दक्ष कर्मचारीको अभावमा काम रोकिएको बताए ।
समयमा उपभोक्ताहरुले पनि पैसा नदिने र नतिर्ने कारण कतिपय अवस्थामा नगरले दिएको र संकलन भएको रकमले कर्मचारी व्यवस्थापनमा समस्या पर्ने गरेको बताइएको छ । फोहोर व्यवस्थापनका लागि मासिक ७ देखि साढे सात लाख रुपैयाँ सम्म खर्च आउने बताइएको छ । खर्च गरे अनुसार फोहोरको स्थायी व्यवस्थापन नभए बड्दो शहरीकरणमा थप चुनौती आउने नागरिक अगुवाहरु बताउछन् ।
किन हुन सकेन दमकमा फोहोर ब्यावस्थापन ?
इलामको चुलाचुलीमा बाख्रा बजार शुरु
चुलाचुली/ इलामको चुलाचुली गाउँपालिका ४ मा आजबाट बाख्रा बजार शुरु भएको छ । चुलाचुली ४ स्थित आइतबारेमा आयोजित उद्घाटन कार्यक्रममा गाउँपालिकाका अध्यक्ष प्रदिप चन्द्र राई, उपाध्यक्ष निर्मला दाहाल, गाउँपालिकाका कार्यकारी अधिकृत छबिलाल खतिवडा र कमल रतुवा सामुदायीक बाख्रा श्रोत अध्ययनका अध्यक्ष लक्ष्मि प्रसाद न्यौपानेले संयुक्त रुपमा ब्यानर खोलेर मंगलबारे बजारको उत्घाटन गर्नु भयो ।
कार्यक्रममा बजार संचालनका लागी ढेड कट्ठा जग्गा दान गर्नुभएका दम्पती डम्बर कुमार एवा र विष्णु माया एवालाई प्रमुख अतिथि गाउँपालिकाका अध्यक्ष प्रदिप चन्द्र राइ तथा उपाध्यक्ष निर्मला दाहालले दोसल्ल ओडाएर सम्मान समेत गर्नु भएको थियो । कार्यक्रममा पहिलो बाख्रा खरिद गर्ने स्थानिय व्यापारी दिलमान भट्टराई र पहिलो विक्रेता होमनाथ दाहाललाई पनि सम्मान गरिएको थियो । त्यस्तै बजारमा ल्याइएका बोका मध्येबाट उत्कृष्ट बोका छनोट गरिएका कृषक रोशन दाहाललाई उत्कष्ट कृषकबाट सम्मान गरिएको थियो ।
उनको बोकाको तौल ४६ केजीको रहेको थियो । त्यस्तै बजारमा सबैभन्दा बढी तौलको बोका हेमन्त लामिछानेको साढे ४७ केजीको थियो । बजारमा जमुना पारी तथा बोयर जातका बोकाहरु पनि बिक्रीका लागि ल्याइएका थिए । कार्यक्रमा प्रमुख अतिथि राईले सम्बोधन गर्दै चु्लाचुलीको एकमात्र बाख्रा बजार भएकाले बजारलाई निरन्तरता दिन र स्तरीय बनाउन गाउँपालिकाले कुनै कसर बाँकी नराख्ने भन्दै आँफूहरुको सर्धै साथ र सहयोग रहने प्रतिबद्धता जनाउनु भयो । वँहाले पशु बजारका लागि पनि गाउँपालिकाले आवश्यक सहयोग गर्ने बताउनु भयो ।
कार्यक्रममा उपध्यक्ष निर्मला दाहाल, कार्यकारी अधिकृत छबिलाल खतिवडा,वडा नम्बर ३ का वडा अध्यक्ष नर बहादुर लावती , वडा नम्बर ४ का वडा अध्यक्ष कालिदास भट्राई,कमल रतुवा सामुदायीक बाख्रा श्रोत अध्ययनका अध्यक्ष लक्ष्मि प्रसाद न्यौपाने, नरेन्द्र गिरी प्रतिष्ठानकी गिता पुरी लगायतले मन्तव्य राखुनु भएको थियो । कार्यक्रम बजार ब्यवस्थापन समितिका अध्यक्ष डिल्ली दुलालको अध्यक्षतामा भएको थियो ।
विरामी भारत पुर्याएर ठग्ने पक्राउ
झापा/ उपचारको नाममा विभिन्न आश्वासन देखाएर भारतको पानीट्यांकीस्थित ‘माँ पाथीभरा क्लिनिक’मा बिरामी पुर्याउँदै ठगी गरेको आरोपमा आज एक व्यक्ति पक्राउ परेका छन् ।
पक्राउ पर्नेमा सोही क्लिनिकमा कार्यरत झापा मेचीनगर नगरपालिका निवासी भूपेन्द्र भट्टराई रहेका छन् । भट्टराईले बिरामीलाई विभिन्न आश्वासन देखाएर उपचारका लागि भारत लगि ठग्ने गरेको बताइएको छ ।
पछिल्लो समय बाह्रदशी गाउँपालिका–– २ राजगढका कालीबहादुर भण्डारी ठगिएको र उहाँले दिएको उजुरीका आधारमा प्रहरीले भट्टराईलाई पक्राउ गरेको इलाका प्रहरी कार्यालय बिर्तामोडले जनाएको छ ।
भट्टराईले पानीट्यांकीको माँ पाथीभरा क्लिनिकमा आफूलाई ‘सहायक विशेषज्ञ’ का रुपमा कार्यरत रहेको भन्दै ठगी गरेको भण्डारीको आरोप छ । पक्राउ परेका भट्टराईलाई प्रहरीले सार्वजनिक अपराध ऐनअन्तर्गत मुद्दा दर्ता गरेर अनुसन्धान अघि बढाएको छ ।
सय दिनमा १ सय ५८ काम गर्ने प्रदेश सरकारको घोषणा
विराटनगर/ संचितकोष स्थापना नभए पनि प्रदेश १ सरकारले आगामी सय दिनमा १ सय ५८ कामगर्ने घोषणा गरेको छ । केन्द्र सरकारसँग अनुदान लिएर आगामी चैत्र १५ गते करिव ३ महिनाका लागि बजेट ल्याउने तयारीमा जुटेको प्रदेश सरकारले सय दिने कार्यक्रम सावृजनिक गरेको हो ।
सय दिनभित्र पुरा गर्ने र सय दिनभित्रमा सुरु गर्ने गरी दुई प्रकृतिका कार्यक्रम घोषण गरिएको मुख्यमन्त्री शेरधन राईले बताए ।
सरकार गठन भएको १९ दिनपछि प्रदेश सरकारले आगामी सय दिनमा गर्ने कार्यक्रमहरु सार्वजनिक गरेको हो । सय दिने कार्यक्रम ल्याउने विषयमा फागुन २० गतेको मन्त्रिपरिषदको बैठकले निर्णय गरेको थियो ।
आगामी सरकारको दिशानिर्देशन प्रष्ट हुनेगरी प्रदेशले सुशासनलाई पहिलो प्राथमिकता राखेको छ भने भ्रष्टाचारलाई शुन्य सहनशिलता र सुरक्षालाई उच्चप्राथमिकतामा राख्ने जनाएको छ । प्रदेशका लागि आवश्यक कानून निर्माण गर्ने, प्रत्येक गाउँ, नगर र महानगरमा व्यवस्थित सूचना केन्द्र स्थापना गर्ने, सार्वजनिक सुनुवाई तथा गुनासो सुनुवाईका कार्यक्रमहरु नियमित गर्ने घोषणा गरिएको छ । यस्तै प्रदेशभित्र भूमि खण्डिकरणलाई निरुत्साहित गर्ने र कृषि उत्पादनलाई वृद्धि गर्ने कार्यक्रममा उल्लेख छ ।
कृषितर्फ नगदेवालीको उत्पादकत्व वृद्धि गर्ने तथा दुध, मासु र अण्डा उत्पादनमा प्रदेश नम्वर १ लाई आत्मनिर्भर बनाउने घोषणा गरिएको छ ।
प्रदेश सरकारले आगामी दिनमा प्रदेशमा ७० प्रतिशत विद्यार्थीलाई प्राविधिक शिक्षा प्रदान गर्ने र ३० प्रतिशतलाई मात्र सैद्धान्तिक शिक्षा दिने गरी नीति तय गर्ने जनाएको छ । स्वास्थ्य क्षेत्रलाई व्यापारिककरण हुन नदिने गरी नियन्त्रण गरिने तथा मदिरा र सुर्तीजन्य वस्तुको उत्पादन, विक्रि र भण्डारिकरणमा नियमन गरिने सय दिने कार्यक्रममा उल्लेख छ ।
आर्थिक मामिला तथा योजना मन्त्री इन्द्र आङ्बोले आगामी चैत्र १५ गते ल्याउने बजेट केन्द्र सरकारको अनुदानमा आधारित हुने पनि जानकारी दिए । कार्यक्रम तय भइसकेकोले अब कार्ययोजना तयार गरी अघि बढ्ने मुख्यमन्त्री शेरधन राईले जानकारी दिए ।
नयाँ शक्तिका प्रवक्ता माओवादी केन्द्रमा
काठमाडौं / नेकपा माओवादी केन्द्रका अध्यक्ष पुष्पकमल दाहाल प्रचण्डले नयाँशक्ति पार्टीका प्रवक्ता खिमलाल देवकोटालाई पार्टी प्रवेश गराएका छन् । पार्टी कार्यालय पेरिसडांडामा मंगलबार आयोजित कार्यक्रममा पूर्वमाओवादी नेता देवकोटा पुरानै पार्टीमा फर्केका हुन् ।
पार्टी प्रवेश कार्यक्रममा अध्यक्ष प्रचण्डले बलियो कम्युनिष्ट केन्द्रको निर्माण समयको माग रहेको बताए । स्थायित्व, समृद्धि र विकासको जनताको चाहना बुझेर एउटै शक्तिशाली कम्युनिष्ट केन्द्रको स्थापना गर्ने अभियान सुरु भएको उनको भनाई थियो ।
प्रचण्डले भने, ‘समाजवादमा जाने हो भने सवै कम्युनिष्ट एक हुनुपर्छ । नक्कली सक्कली बनेर हुँदैन । भित्रै बहस गरेर को ठीक को बेठीक भन्ने थाहा हुन्छ ।’ कार्यक्रममा अध्यक्ष प्रचण्डले नयाँ शक्ति नेपालका संयोजक डा बाबुराम भट्टराईलाई पनि पार्टीमा फर्किन आव्हान गरे । उनले भने, ‘रेलको डिब्बा छाडेर इन्जिन मात्रै हिँडेर हुँदैन, मालसामान छाडेर इन्जिन मात्रै कुदेर के हुन्छ ? जनता, कार्यकर्ता, आफ्नै रगत र पसिनाका उपलब्धि छाडेर हिँडे मनोगत बाहेक केही हुँदैन । अप्ठ्यारो र लाज नमानी पार्टीमा फर्किनुस् ।
माओवादी आन्दोलनका नेता कार्यकर्ताले बाबुरामलाई माया गर्ने बताउनुहुँदै प्रचण्डले पार्टीमा पुनर्मिलन हुन अनुरोध गरे । “इतिहासको निर्माता जनता हुन, नेता त जनताको भावना प्रतिनिधित्व गर्ने सेवक हो भन्ने कित्तामा कि इतिहास निर्माता महापुरुष र अलौकिक विद्वान हुन् भन्ने कित्तामा भनेर बाबुरामजीलाई भन्ने गरेको थिए,’ अध्यक्ष प्रचण्डले स्मरण गर्दै भने, “उहाँ एक्लै इतिहास निर्माण गर्न कुद्नुभयो ।” उक्त अवसरमा पार्टी प्रवेश गरेका नयाँशक्तिका प्रवक्ता तथा नेता खिमलाल देवकोटाले बाबुरामको मनसाय राम्रो भएपनि हिँड्ने तरिका ठिक नभएको टिप्पणी गरे ।
दुर्घटनामा शसस्त्र प्रहरीको मृत्यू
झापा/ झापाको कचनकवल गाउँपालिकामा भएको मोटरसाईकल दुर्घटनामा एक शसस्त्र प्रहरी जवानको मृत्यु भएको छ भने एक जना घाइते भएका छन् ।
मंगलबार राति करिब ११ बजे कचनकवल गाउँपालिका १ पोकलाबान स्थित घेराबारी राजगढको भित्री सडक खण्डमा घेराबारीबाट राजगढ तर्फ आउँदै गरेको बा ९३ प १८५ नंबरको मोटरसाईकल अनियन्त्रित भई पल्टदा शसस्त्र प्रहरी घेराबारीमा कार्यरत खगेन्द्र राईको मृत्यू भएको हो ।
ससस्त्र प्रहरी बकरी मोरङमा कार्यरत मोटरसाईकल चालक हर्क कुमार राजवंशी गम्भिर घाईते भएका छन् ।
दुर्घटनामा घाईते खगेन्द्रको उपचारको क्रममा झापाको बिएण्डसी अस्पताल बिर्तामोडमा मृत्यू भएको जिल्ला ट्राफिक प्रहरी कार्यालय झापाले जनाएको छ । घाईते हर्ककुमारको गम्भिर अबस्थामा बिएण्डसी अस्पतालमानै उपचाार भईरहेको ट्राफिक प्रहरी कार्यालय झापाका प्रमुख राजेश राईले बताए ।
मृतक राईको संखुवासभा सभापोखरी गाउँपालिका २ र घाईते राजबंशीको कचनकवल गाउँपालीका ८ झापा स्थाई घर रहेको प्रहरीले बताएको छ ।
धनकुटा र तेह्रथुममा एकै दिन नौ घर जले
धनकुटा/तेह्रथुम/ धनकुटा नगरपालिका–९ माहाङस्थित जलकल्याण सामुदायिक वनमा लागेको डढेलो बस्तीमा सल्किएपछि तीन घर र दुई गोठ जलेका छन् ।
कुनै मानवीय क्षति नभएपनि ६ वटा गाई वस्तु तथा २ बाख्रा सहित करिब एक दर्जन घरपालुवा जनावर मरेका छन्। घटनास्थलमा नेपाली सेना, नेपाल प्रहरी र सशस्त्र प्रहरी बल आगो नियन्त्रणका लागि परिचालन गरिएको जिल्ला प्रहरी प्रमुख सुदीप राजभण्डारीले जानकारी दिए ।
सामुदायिक वनका उपभोक्ता तथा स्थानीयबासीले आगो नियन्त्रणको प्रयास गरेपनि हावा चलेसँगै नियन्त्रण बाहिर गएको वडाध्यक्ष सन्दीप रायामाझीले जानकारी दिए ।
आगो नियन्त्रणमा नआए बस्तीका अन्य घरहरु जोखिममा परेका छन् । लामो समयसम्म वर्षात नहुनु र सुख्खा यामका कारण जिल्लाका अन्य आधा दर्जन सामुदायिक वनमा डढेलो लागेको जिल्ला वन कार्यालय स्रोतले जनाएको छ ।
यसैगरी तेह्रथुमको लालिगुराँस नगरपालिका–८ सोल्मामा अहिले आगलागी भइरहेको छ । आगलागी हुँदा ६ वटा घर जलेर नष्ट भएका छन् । सामुदायिक वनमा लागेको आगो बस्तीमा फैलँदा गोविन्द अधिकारी, लक्ष्मी अधिकारी, नेत्रप्रसाद अधिकारी, एकराज तिम्सिना, गुरुप्रसाद लुइटेल र लोकनाथ न्यौपानेको घर जलेर नष्ट भएको प्रमुख जिल्ला अधिकारी बेदनिधि खनालले बताए ।
फोरमले गर्यो ओली नेतृत्वको सरकारमा जाने औपचारिक निर्णय
दमक/ संघीय समाजवादी फोरम केपी शर्मा ओली नेतृत्वको सरकारमा सहभागी हुने भएको छ । फोरमको मंगलबार पार्टी कार्यालय तीनकुनेमा बसेको केन्द्रीय कार्यसमितिको बैठकले ओली नेतृत्वको सरकारमा सहभागी हुने निर्णय गरेको महासचिव रणध्वज कन्दङवाले जानकारी दिए ।
सत्तारुढ दल नेकपा एमाले र माओवादी केन्द्रबीच लामो समयदेखि जारी वार्ता सकारात्मक भएकाले सरकारमा जाने नीतिगत निर्णय गरेको कन्दङवाको भनाई छ ।
तीन दलबीच पहिचान र अधिकारसहितको संघीयतालाई आधार मानेर उत्पीडित र उपेक्षित समुदायका मुद्धा सम्बोधन गर्न संविधानको धारा २७४ संसोधन गर्ने समझ्दारी भएको भन्दै फोरमले सरकारमा जाने निर्णय गरेको हो ।
के छ धारा २७४ मा २७४. संविधान संशोधन ः
(१) नेपालको सार्वभौमिकता, भौगोलिक अखण्डता, स्वाधीनता र जनतामा निहित सार्वभौमसत्ताको प्रतिकूल हुने गरी यो संविधान संशोधन गर्न सकिने छैन ।
(२) उपधारा (१) र यस संविधानको अन्य धाराको अधीनमा रही यस संविधानको कुनै धारालाई संशोधन वा खारेज गर्ने विधेयक संघीय संसदको कुनै पनि सदनमा पेश गर्न सकिनेछ । तर उपधारा (१) लाई संशोधन गरिने छैन ।
(३) उपधारा (२) बमोजिम पेश भएको विधेयक सम्बन्धित सदनमा प्रस्तुत भएको तीस दिनभित्र सर्वसाधारण जनताको जानकारीका लागि सार्वजनिक रूपमा प्रकाशन गर्नु पर्नेछ ।
(४) उपधारा (२) बमोजिम पेश भएको विधेयक कुनै प्रदेशको सीमाना परिवर्तन वा अनुसूची–६ मा उल्लिखित विषयसँग सम्बन्धित भएमा त्यस्तो विधेयक संघीय संसदमा प्रस्तुत भएको तीस दिनभित्र सम्बन्धित सदनको सभामुख वा अध्यक्षले सहमतिका लागि प्रदेश सभामा पठाउनु पर्नेछ ।
(५) उपधारा (४) बमोजिम पठाइएको विधेयक तीन महीनाभित्र सम्बन्धित प्रदेश सभाका तत्काल कायम रहेका सम्पूर्ण सदस्यहरूको बहुमतबाट स्वीकृत वा अस्वीकृत गरी त्यसको जानकारी संघीय संसदमा पठाउनु पर्नेछ । तर कुनै प्रदेश सभा कायम नरहेको अवस्थामा त्यस्तो प्रदेश सभा गठन भई त्यसको पहिलो बैठक बसेको मितिले तीन महीनाभित्र स्वीकृत वा अस्वीकृत गरी पठाउनु पर्नेछ ।
(६) उपधारा (५) बमोजिमको अवधिभित्र त्यस्तो विधेयक स्वीकृत वा अस्वीकृत भएको जानकारी नदिएमा संघीय संसदको विधेयक उत्पत्ति भएको सदनले त्यस्तो विधेयक उपरको कारबाही अगाडि बढाउन बाधा पर्ने छैन ।
(७) उपधारा (५) बमोजिमको अवधिभित्र बहुसंख्यक प्रदेश सभाले त्यस्तो विधेयक अस्वीकृत गरेको सूचना संघीय संसदको सम्बन्धित सदनलाई दिएमा त्यस्तो विधेयक निष्क्रिय हुनेछ ।
(८) प्रदेश सभाको सहमति आवश्यक नपर्ने वा उपधारा (५) बमोजिम बहुसंख्यक प्रदेश सभाबाट स्वीकृत भई आएको विधेयक संघीय संसदका दुबै सदनमा तत्काल कायम रहेका सम्पूर्ण सदस्य संख्याको कम्तीमा दुई तिहाइ बहुमतबाट पारित गर्नु पर्नेछ ।
(९) उपधारा (८) बमोजिम पारित भएको विधेयक प्रमाणीकरणका लागि राष्ट्रपति समक्ष पेश गरिनेछ ।
(१०) राष्ट्रपतिले उपधारा (९) बमोजिम पेश भएको विधेयक प्राप्त भएको पन्ध्रदिन भित्र प्रमाणीकरण गर्नेछ र प्रमाणीकरण भएको मिति देखि संविधान संशोधन हुनेछ ।
दमक क्याम्पस र इलाका प्रहरी कार्यालयको यस्तो हविगत
दमक/मन्त्रीले सौचालयको अनुगमन गरे भन्दा तपाइलाई अचम्म लाग्न सक्छ, तर प्रदेश एकमा सौचालयको छड्के अनुगमन शुरु भएको छ ।
सोमबार प्रदेश नंं. १ का सामाजिक विकास मन्त्री जिबन घिमिरे दमकको मालपोत कार्यालय सहित केहि कार्यालय र दमक आउने सूचना केहि ब्याक्तिहरुलाइ मात्र थियो । सुरक्षाकर्मीलाइ समेत जानकारी थिएन ।
कारण थियो अनुगमन । त्यो पनि शौचालयको । मन्त्री घिमिरे मन्त्रालयका कर्मचारीहरु सहित आएर सिधै शौचालय हेर्न थाले । सबै छक्क परे । मन्त्री आएर के अनुगमन गर्ने खोजे भने डरले थरर बनेकाहरु शौचालय हेर्न आएको थाहा पाएपछि सवै छक्क परेका छन् ।
दमक बहुमुखि क्याम्पसको शौचालय एकक्षण पनि बस्न नसकिने अवस्था रहेको पाएको छ । अरुलाई शिक्षा दिने लेक्चरहरुको सौचालय यस्तो हुनुका पछि सिंगो क्याम्पस र लेक्चरहरु माथि नै स्वास्थ्यको प्रश्न चिन्ह देखापरेको अनुगमन टोलीका एक सदस्यले बताए ।
शौचालय अनुमनमा पुगेकाहरु त्यहाँ पुग्नसाथ हवास्स गन्ध आएको थियो । इलाका प्रहरी कार्यालय दमकको शौचालय त भरिएर दिशापीसाव नै बाहिर रहेको पाइएपछि अफीसरहरुको हविगत छर्लङग भएको छ ।
मन्त्री घिमिरेले शौचालयहरुको अवस्थाको बिषयमा मन्त्रालयले अनुगमन प्रतिवेदन बनाएर सार्वजनिक गरिने उल्लेख गरे ।
झापाका शहीद हस्ता परिवारको घर पार्टीले बनाइदिने
झापा/ झापाका शहीद हस्ता परिवारको घर पार्टीले बनाइदिने भएको छ । शहीद सप्ताह–२०७४को सन्दर्भ पारेर माओवादी केन्द्रले शहीद परिवारको लागि भापाको गौरादहमा घर निर्माण कार्यको शिलान्यास गरेको छ ।
सप्ताहा समापनको दिन आज सोमवार नेकपा माओवादी केन्द्र झापा क्षेत्र नं. ५ ले गौरादह नगरपालिका–२ लोदाबारीमा शहीद बिष्णुलाल हस्ता परिवारको लगि घर निर्माणको शिलान्यास गरेको हो ।
माओवादी केन्द्रका युवा नेता गगन पुरीको प्रमुख उपस्थितिमा सिलन्यास गरिएको सो घर निर्मााणको लागत अनुमानित १० लाख रुपयाँ रहने बताइएको छ ।
निर्माण समितिका अध्यक्ष डिल्लि रिजालको सभापतित्वमा सम्पन्न सिलन्यास कार्यक्रममा शहीद बिष्णुलालका समकालिन युवा नेता पुष्प ढकालले शहीद हस्ताको योगदानको बारेमा चर्चा गरेका थिए ।
२०२४ साल पुस १० गते झापाको साबिक तोपगाछीमा जन्मिएका तथा गौरादह २ मा स्थायी बसोबास गर्दैरहेका हस्ताको ०६० साल पुस ९ गते सशस्त्र प्रहरीले गोली हानी हत्या गरेको थियो ।
गौरादह बहुमुखी क्याम्पसमा २०५२ सालको स्ववियु निर्बाचनमा तत्कालिन अखिलको तर्फबाट स्ववियु सदस्यमा निर्वाचित भएका हस्ता विद्यार्थी राजनीति तथा पार्टी राजनीतिमा सक्रिय थिए ।
२०५६ सालबाट माओवादी पार्टीमा सम्लग्न भएका हस्ता २०५७ सालबाट पूर्णकालिन भएका थिए । ०६० सालमा माओवादी पार्टीको एरिया समिति सदस्य जिम्मेवारीमा रहेका विष्णुलाललाई उनका समकालिन ढकालका अनुसार पार्टी भित्र कमरेड “बिकल्प” भनेर चिनिन्थ्यो ।
कार्यक्रममा एकिकृत अखिल नेपाल शिक्षक संगठनका केन्द्रीय उपाध्यक्ष सिताराम अधिकारी, माओवादी केन्द्रका गौरादह नगरकमिटि अध्यक्ष हुकुम नेपाली तथा नगर परिवार, वार्ड नं २ का वार्ड अध्यक्ष राजन खनाल तथा वडा कमिटि परिवार लगाएत स्थानीय नेता कार्यकर्ताको उपस्थिति रहेको थियो ।
