दमक /  ३ महिना देखी मासिक किस्ता बुझाउन नसकेको कारण देखाउदै विगत १ हप्ता देखी एन.आई. एसिया बैंक दमक शाखाले  ऋणीको घरमा आफ्नो सुरक्षा गार्ड राखेको विरोधमा दमक उद्योग वाणिज्य संघले गम्भीर ध्यानाकर्षण गराएको छ ।

एन.आई. एसिया  बैंकले दमक ५ स्थित व्यवसायी दर्गाप्रसाद कडेलको घरमा केही दिन देखि विहान ९ बजे देखी साँझ ७ बजे सम्म सुरक्षा गार्ड राख्दै आएको थियो ।

संघका वरिष्ठउपाध्यक्ष राजु खड्का द्वारा हस्ताक्षरित ध्यानाकर्षण पत्रमा देशको आर्थिक अवस्था निकै संकटमा रहेको र विभिन्न बैंक तथा वित्तिय संस्थाहरुबाट बृद्धि गरिएको चर्को बैक व्याजदरका कारणले पनि उद्यमी व्यवसयी तथा ऋणीहरुले मासिक किस्ता बुझाउन प्रतिकुल अवस्थाको शृजना भएको अवस्था बैंकको यस्तो निन्दनिय कार्य गरेकोमा आपति जनाएको छ ।

संघ द्वारा जारी ध्यानाकर्षण पत्र

एनआइसी एसिया बैकले समयमा किस्ता रकम नबुझाएको भन्दै एक ऋणिको घरमा सुरक्षा गार्ड पठाएको छ । बैकको यस कार्यको अहिले स्थानीय रुपमा सर्वत्र आलोचना गरिएको छ । बैँकले पैसा उठाउन चालेको यस कदमलाई दादागिरी शैली अपनाएको भन्दै सर्वत्र निन्दा समेत गरिएको छ ।

दमक नगरपालिका ५ का दुर्गाप्रसाद कडेँलको घरमा ३ दिनदेखि बैकले घरमा बैँकका सुरक्षागार्ड पठाएको हो । हाल कडेँलको घरमा दैनिक ९ बजेदेखि बेलुकी ५ बजेसम्म घरको दैलोमा सुरक्षाकर्मी राख्ने गरेको छ । आफुले व्यावसायमा समस्या आएकोले ३ महिना अगाडिदेखि बैँकमा साँवा ब्याज हाल्न नपाएको घरधनी कडेँलले बताउँनुभयो ।

४ दिनपहिले बैँकले जति हुन्छ त्यति रकम लिएर आउनु भनेकोमा आफुसग भएको १० हजार रुपैँया लगेर भौचर हालेकोमा सोहिदिनदेखि बैँकले आफ्नो धितोको सुरक्षा गर्न भन्दै एकजना नियमित रुपमा सुरक्षागार्ड राखिदिने गरेको घरधनी कडेँलले बताउँनुभयो । बैँकमा आफ्नो १ करोड रुपैया ऋण लिएकोमा अब साँबा ब्याज गरेर ९७ लाख रुपैँया तिर्न बाकी रहेको कडेँलले बताउँनुभयो । घरमा पाहुनाहरु आउँदा सुरक्षा गार्डले सलाम हान्ने गरेको बताउँदै आफ्नो समाज र आफन्तजनमा बेइज्यती भएको श्रीमती चन्द्रकला कडेँलले बताउँनभयो । बैँकले समयमा साँबा ब्याज नतिर्दा चिठ्ठी काट्ने, सुचना टास्ने र लिलामीको प्रक्रिया गर्नुपर्नेमा घरमै सुरक्षाकर्मी पठाएर आफुहरुलाई बन्धक बनाउँदा स्वतन्त्रपुर्वक बाच्न पाउने हकबाट बञ्चित गराएको कडेँल परिवारको गुनासो रहेको छ ।

यसवारेमा नेपाल राष्ट्रिय बैँकका सहयाक प्रवक्ता नारायणप्रसाद पोखरेल एनआईसी मात्रै नभएर कुनैपनि बैँकले यसरी ऋणिको घरमा सुरक्षागार्ड राख्नु केन्द्रिय बैँकको निति विपरित भएृको बताउँनुभयो । बैँकले आफ्नो सम्पत्तिको सुरक्षा र कर्जा असुलीका अन्य थुप्रै तैरतरिका हुदाहुदै बैँकले यसो गर्नु बैँकको निति विपरित भएको प्रवक्ता पोखरेलले बताउँनुभयो ।

यता एनआइसी एसिया बैँकका दमक साखा प्रबन्धक तीर्थ प्रधानले दमकमा ऋणिको घरमा बैँकले सुरक्षागार्ड पठाएको बताउँदै यसको सम्पुर्ण जिम्मेवार बैँकको केन्द्रिय समितिले हेर्ने भएकोले किन सुरक्षागार्ड पठाइयो भन्नेवारेमा आफुलाई केहिपनि जानकार नभएको बताउँनुभयो ।

दमक / दमक नगरमा क्रियाशील ६ वटा विभिन्न राजनीतिक दलले नगरपालिका नगर कार्यपालिकाको गत चैत ७ गते भएका निर्णयहरु विवादस्पद र व्यक्तिगत स्वार्थ केन्द्रित भएको आरोप लगाउँदै त्यसलाई सच्याउनु पर्ने माग अघि सारेका छन् ।

नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी, नेपाल कम्युनिष्ट पार्टी र संघीय लिम्बुवान मञ्चले आज संयुक्त पत्रकार सम्मेलन गर्दै नगर प्रमुख रामकुमार थापाले बहुमतीय खेलमा लागेर नेकपा एमाले सम्बद्ध जनप्रतिनिधिहरुको उक्साहटमा जनभावना र चुनावबाट प्राप्त मतादेश विपरित स्वास्थ्य संयोजक बनेर दमक अस्पतालमा नीतिगत रुपमै चलखेल गर्न खोजेको आरोप समेत लगाएका हुन् ।

कांग्रेस केन्द्रीय सदस्य समेत रहेकी नेतृ महेन्द्रकुमारी लिम्बू, कांग्रेस कोशी प्रदेश समिति सदस्य समेत रहेकी नगर उपप्रमुख रेगिना भट्टराई, भुमिराज राई लगायतका पार्टी नेतृत्वको उपस्थितिमा भएको पत्रकार सम्मेलनमा नगर उपप्रमुख भट्टराईले चैत ७ गतेको कार्यपालिका बैठकमा नगर प्रमुख थापाले सहमतिका लागि आफूले पहल गर्ने र सबैलाई मान्य हुने निर्णय गरिने भनेर आश्वासन देखाएर अन्तमा संवाद, सहमति र सहकार्यलाई तोडदै एकतर्फी रुपमा विभिन्न समितिहरुको प्रस्ताव कार्यपालिकामा लगेको र एमाले, राप्रपाको बहुमतबाट पारित भएको घोषणा गरेको जिकिर गरिन् । उनले भनिन् ,–‘सहमतीय अभ्यास र परम्परालाई तोडेर नगरमा बहुमतको दम्भ प्रस्तुत गर्दा दमकको बृहत्तर हित र बिकासमा प्रतिकुल असर पर्न सक्ने तर्फ गम्भिर हुनुपर्नेमा बहुमत पक्षीय जनप्रतिनिधिहरु संवेदनशील नहुनु ठिक नभएकाले आफूहरु असहमति राखेर बैठकबाट बाहिरिन बाँध्य भयौ । ’

पत्रकार सम्मेलनमा वितरित संयुक्त प्रेस विज्ञप्तिमा संघीय लोकतान्त्रिक गणतन्त्र, समावेशी लोकतन्त्रको मर्म र भावना विपरित स्वेच्छाचारी, निरंकुश र प्रतिगामी हर्कतको भत्र्सना गर्दै यस्ता हर्कतका विरुद्ध राजनीतिक र कानुनी रुपमा सशक्त किसिमले प्रतिवाद गर्ने चेतावनी समेत दिइएको छ । विज्ञप्तिमा दमक नगर भित्र राजनीतिक अनिश्चय, अन्योलता र अराजकता सृजना गर्ने नगर प्रमुखसहित गलत निर्णयका लागि उक्साउने एमाले जनप्रतिनिधिहरुलाई आफनो पदको गरिमा कायम राख्न समेत चेतावनी दिइएको छ ।

विज्ञप्तिमा चैत ७ गते भएका निर्णयहरु तुरुन्त सच्याउँदै सार्वजनिक महत्वका बिषयहरुमा सर्वपक्षीय सहभागिता अनिवार्य गर्न आग्रह पनि गरिएको छ । चैत ७ मा नगर कार्यपालिकाको बैठकले नगर स्वास्थ्य संयोजक नगर प्रमुख थापालाई तोक्दै एमाले र राप्रपा निकटका स्वास्थ्य सामग्री, औषधि व्यवसायीहरु समेतलाई समितिको सदस्यका रुपमा तोकेको थियो ।

त्यस्तै शिक्षा समिति संयोजकमा दमक ९ का वडाध्यक्ष कुबेर भट्टराईलाई र ८ का वडाध्यक्ष धर्मप्रसाद दाहाललाई प्रवक्ताको जिम्मेवारी दिइएको थियो । बैठकका निर्णयहरु आधिकारिक रुपमा सार्वजनिक गर्ने नगरपालिकाको यसअघिको अभ्यास अहिले तोडिएको छ भने अघिल्लो पटक नगर उपप्रमुखको अध्यक्षतामा स्वास्थ्य समिति ( दमक अस्पताल समेत) , उपप्रमुखकै संयोजकत्वमा शिक्षा समिति रहेको थियो भने उपप्रमुखलाई नै नगरको प्रवक्ता तोकिएको थियो । नगरमा यसअघि भएको नजिरलाई तोडेर यसपटक बहुमतका आधारमा राप्रपा र एमालेबाट निर्वाचित जनप्रतिनिधिहरुले यी महत्वपूर्ण पदमा जिम्मेवारी लिँदै कांग्रेसबाट निर्वाचित उपप्रमुख र कांग्रेसबाट निर्वाचित जनप्रतिनिधिहरुलाई कार्यपालिकाबाट थप कुनै जिम्मेवारी नदिइएपछि कांग्रेससहितका ६ दलहरु असन्तुष्ट बनेका हुन् ।

आजको पत्रकार सम्मेलनमा कांग्रेस नेतृ लिम्बू, क्षेत्रीय सभापति ढुण्डीराज भण्डारी, माओवादी दमक नगर इञ्चार्ज बेदु गौतमसहित नेताहरुले नगरपालिकामा बहुमतका आधारमा पेल्ने र जनभावना विपरितका अभ्यासहरु हुने गरेको भनि कडा आलोचना गरे । त्यहाँ वितरित प्रेस विज्ञप्तिमा कांग्रेसका दमक नगर सभापति प्रकाश प्रसाइँ, माओवादी केन्द्रका नगर अध्यक्ष कुलबहादुर बस्नेत, जसपाका नगर अध्यक्ष महेन्द्र चाम्लिङ, एकीकृत समाजवादीका नगर अध्यक्ष महेश घिमिरे, नेकपा दमक सचिव कमल पराजुली र संघीय लिम्बुवान मञ्चका नगर अध्यक्ष यामबहादुर लोरिङदेनले हस्ताक्षर गरेका छन् ।

 दमक/ प्रविधिमैत्री कृषि अभियानका लागि दमक नगरपालीकाले कृषकहरुलाई आधुनिक कृषि सामाग्री वितरण गरेको छ । नगरभित्र रहेका कृषकहरुलाई समुह मार्फत पचास प्रतिशत अनुदानमा बिषादि छर्किने ईलेक्ट्रिक पावर स्प्रेयर र मकै छोडाउने मेसिन बितरण गरेको हो ।

नगरपालीकामा आज आयोजित कार्यक्रममा नगर प्रमुख राम थापा, उप प्रमुख रेगिना भट्टराईले ति समाग्रिहरु कृषक समुहलाई हस्तान्तरण गर्नु भएको थियो । कृषक समुहलाई उक्त सामाग्रि वितरण गर्दै नगर प्रमुख थापाले आर्थिक मन्दिका कारण सोचेजति सहयोग गर्न नपाए पनि भए सम्मको सहयोग उपलब्ध गराईएको बताउनु भयो । यस अघि सरकारले दिएको अनुदान बास्तविक किशान सम्म पुग्न नसकेको गुनासो आए पनि अहिले भने बास्तविक किषानहरु छनौट गरेरनै वितरण गरिएको बताउनु भयो । कार्यक्रममा नगर उप प्रमुख भट्टराईले कृषि सामाग्रि सहित माटोको परिक्षण, मल विउ वितरण लगायतका सेवा समेत सञ्चालन गरेको भन्दै यसबाट लाभ लिन सबै कृषकहरुलाई आग्र गर्नु भयो ।

कृषकहरुलाई समुह मार्फत १५ वटा पावर स्प्रेयर र २० वटा मकै छोडाउने मेसिन वितरण गरिएको नगरपालीकाकी कृषि शाखा प्रमुख चन्द्रकला भट्टराईले जानकारी दिनुभयो । २३ हजार ५ सय रुपैयाँ मकै छोडाउने मेसिन र ४ हजार ५ सय रुपैयाँ पावर स्प्रेयर मेशिन पचास प्रतिसत अनुदानमा कृषक समुहलाई वितरढण गरिएको उहाँले बताउनु भयो ।

नगरपालीकाको आर्थिक बिकाश समिति सम्योजक ईन्द्र गुरुङको अध्यक्षतामा भएको कार्यक्रममा वडा नम्बर १ का वडा अध्यक्ष हरि न्यौपानेको समेत उपस्थिति रहेको थियो ।