दमक/ रोजगारदाता र रोजगारीका लागि इच्छुक युवा युवतीहरुलाई लक्षित गरेर दमकमा दोश्रो पटक रोजगार मेलाको आयोजना गरिने भएको छ । दमक उद्योग वाणिज्य संघले दमक नगरपालिकाको आर्थिक तथा स्वीस परियोजना अन्तर्गतको हेल्भटास नेपालको प्राविधिक सहयोगमा १४ असारमा हुने मेलाका बारेमा मंगलबार पत्रकार सम्मेलन गरेर जानकारी दिइएको हो ।

वृत्ती परामर्श तथा रोजगार मेला नाम दिइएको त्यस किसिमको मेला दमकमा दोश्रो पटक हुन लागेको हो । यसअघि गत बर्ष पनि यस किसिमको मेला आयोजना गरिएको थियो ।

दमक नगरपालिकाका प्रमुख रामकुमार थापा , उपप्रमुख रेगिना भटटराई प्रसाईको उपस्थितिमा आयोजित पत्रकार सम्मेलनमा संघका अध्यक्ष गोपाल गुरागाईले मेलाको तयारीमा भईरहेको विविध विषयमा जानकारी गराए । एकदिने मेलामा तालिम प्रदायक संस्था,रोजगारी अवसर खोजीरहेका युवाहरुको उल्लेखीय सहभागिता रहने उनले जानकारी दिए।

उनका अनुसार मेलामा विधार्थीहरु तथा युवाहरुले वृत्ती परामर्श सेवा तथा जानकारी पाउनुका साथै विभिन्न सीपमुलक तालिम दिने संस्थाहरुको प्रर्दशनी ,तालिमको जानकारी दिइने,रोजगार सम्वन्धी सूचना दिइनुका साथै रोजगारदातासंग प्रत्यक्ष भेटघाट , तालिमको जानकारी ,रोजगारको अवसर प्राप्त गर्न सकिने छ ।

स्थानीय कस्मिक पार्टी प्यालेशमा हुने मेला भव्य रुपमा सम्पन्न गर्न संघका वरिष्ठ उपाध्यक्ष तथा प्रर्दशनी तथा महोत्सव ब्यवस्थापन समितिका संयोजक राजु खड्काको संयोजकत्वमा मूल आयोजक समिति गठन गरिएको छ । भने प्रचार प्रसार समितिको संयोजकमा संघका प्रथम उपाध्यक्ष राजकुमार योङया र सदस्यहरुमा पत्रकारद्धय विष्णु सुब्बा तथा जीवन चुडाल रहेका छन ।

त्यस अवसरमा दमक नगरपालिकाका प्रमुख थापा, उपप्रमुख भटटराईले स्थानीय आवश्यकतालाई पूरा गर्न यस रोजगार मेला उपयोगी हुने औल्याएका थिए । उनीहरुले प्राविधिक, प्रशासनिक क्षेत्रको ब्यक्ति,श्रमिक वर्ग,उधोग ब्यवसाय क्षेत्रका रोजगारदाताको पनि रोजगार मेलामा प्रतिनिधित्व हुने भएकाले रोजगारदातालाई आवश्यकता अनुसारको जनशक्ति उपलब्ध गराउन वृत्ति परामर्श तथा रोजगार मेलाले मद्धत गर्ने विश्वास व्यक्त गरेका थिए ।

दमक / उत्तरी मोरङको मिक्लाजुङ मधुमल्ला ७ मा रहेको रिलायन्स अङ्ग्रेजी माध्यमिक बिद्यालयका विद्यार्थीहरु मिलेर दमकमा रहेका रत्न जेष्ठ नागरिक बृद्वाश्रम दमक ४ र दमक ९ मा रहेको दमक बाल आश्रमलाई आवश्यक सहयोग गरेका छन्।

आफ्नो सामाजिक जिम्मेवारी र दायित्व अन्तरगत रहेर विद्यार्थीहरुले नियमित रुपमा विभिन्न कार्यहरु गर्दै आइरहेका छन्।यो महिना सामाजिक सहयोग , सद्भाव वृद्धिका साथै शिक्षा र समाजलाई जोड्ने कार्यक्रम अन्तरगत यी दुई आश्रमलाई सहयोग गरेको यसै बिद्यालयको कक्षा १० मा अध्ययनरत विद्यार्थी चेतन ढकालले बताउनु भएको छ ।

तीन दिनको आफ्नो खाजा खर्च कटाएर सहयोग रकम सङकलन गरि उक्त आश्रममा दुई दुई थान रेडियो, बृद्धाश्रममा ९ वटा लौरी सबैलाई आवश्यक जुत्ता चप्पल ,छाता,केहि खाद्यान्न सामाग्री तथा फिनेल लगायतका सरसफाइ सामाग्री र दमक बाल आश्रममा सबैलाई आवश्यक पर्ने कापी कलम,रङग पेन्सिल,बिबिध खेल सामाग्री ,छाता ,चप्पल,लुगा र खाद्य सामाग्री बितरण गरि आश्रमका बाल बालिकाहरुसङ विद्यार्थीहरुले छलफल तथा अन्तरक्रिया गरेका थिए।

विविध सामाजिक क्रियाकलापहरुमा सक्रिय गराउदै आएको यस बिद्यालयले विद्यार्थीहरुको रचनात्मक सिर्जनात्मक तथा अन्तरसामाजिक बिकासका लागि विद्यार्थीहरुलाई नियमित रुपमा यस्तै प्रभावकारी कार्यहरु गराउदै आइरहेको छ ।विद्यार्थीहरुको समुहले आजै दुबै आश्रममा आफ्नो निरन्तर सहयोग र आपसी सद्भावका लागि एक एकबटा बिरुवा रोपेर आफ्नो अटुट सहयोगको प्रतिबद्धता जाहेर गरेका छन्।