दमक/ झापाको दमक–६ स्थित फाल्गुनन्द चोकको एक घरबाट प्रहरीले ६ जना जुवाडेलाई रंगेहात पक्राउ गरेको छ । विष्णुहाङ शेर्माको घरबाट प्रहरीले रु १ लाख ४५ हजार ३ सय २५ रुपैयाँसहित ती जुवाडेहरुलाई नियन्त्रणमा लिएको हो ।
गोप्य सूचनाका आधारमा इलाका प्रहरी कार्यालय दमकबाट खटिएको प्रहरीको टोलीले शेर्माको ४ तले घरको पहिलो तलाबाट उनीहरुलाई सोमबार बेलुका ९ बजे पक्राउ गरेको हो । प्रहरीले जुवाको खालबाट रकम, क्यारेम्बोडको गोटी २० थान र २१ बुङ तास समेत बरामद गरेको इलाका प्रहरी कार्यालय दमकले जनाएकोछ ।
शेर्मा जुवा खेल्ने र खेलाउने गर्ने पेशेवर जुवाडे रहेको प्रहरीको दावी छ । पक्राउ पर्ने अधिकांश दमकका प्रतिष्ठित व्यक्तिहरु भएकाले प्रहरीले नाम भने सार्वजनिक गरेको छैन् । पक्राउ परेका सबैलाई जुवा ऐन अनुसार मंगलवारनै जिल्ला अदालतमा कारवाहीका लागि पठाईएको प्रहरी नायव उपरिक्षक दिपक गिरीले जानकारी दिए ।
