दमक/ फागुन २५ गतेबाट देशभर प्रदर्शनमा आउने फिल्म ‘गाजा बाजा’ सहित ३ वटा फिल्म एकैदिन लाग्ने भएपनि कुन हलमा कुन हाल्ने भन्नेमा अन्योल भएको छ । फिल्म ‘गाजा बाजा’ को ट्रेलर सार्वजनिक भएको छ ।
सोमवार दमकमा पत्रकार सम्मेलन गर्दै लेखक तथा निर्देशक गणेशदेव पाण्डेले करिव २ वर्ष कानुनी अड्चन रहेपनि अव फूकुवा भइसकेकाले फिल्म प्रदर्शनमा जान लगेको बताए । यो चलचित्र २ वर्ष अघि नै निर्माण भइसकेको भएपनि चलचित्र विकास बोडले रोक लगाएपछि सर्वौच्च अदालत सम्म मुद्धा चलेको थियो । अहिले गाँजाको चन्द्रविन्दु हटाएर फिल्म चलाउने सहमति भएको उनले बताए ।
यूट्युबमार्फत उक्त फिल्मको ट्रेलर सार्वजनिक गरिएको हो । कमेडी जनरमा निर्माण भएको यस फिल्मको ट्रेलरमा सुशील सिटौला, अनुपम शर्मा र वर्षा सिवाकोटीलाई फिचरिङ गरिएको छ ।
नामको कारण निर्माण घोषणादेखि नै विवादमा मुछिएको फिल्मलाई गणेशदेव पाण्डेले निर्देशन गरेका हुन् ।
दीपेन्द्र रेग्मी र गोमा थापा विष्टको संयुक्त लगानीमा तयार भएको फिल्ममा वर्षा, अनुपम र सुशीलसँगै रविन थापा, अमर सुवेदी, उद्धव भट्टराई, रक्षा श्रेष्ठ, जीवन भट्टराई, गोपाल अर्याल लगायतको अभिनय रहेका छन् । ‘डीआर फिल्म्स’ र ‘टुका इन्टरटेनमेन्ट’ को व्यानरमा निर्माण भएको फिल्ममा निख एण्ड जटाको संगीत, याकोपो रास्लिकको छायांकन, लोकेश बज्राचार्यको सम्पादन रहेको छ । २५ गते दमकको पाथिभरा चलचित्र हलमा एकैदिन २ वटा चलचित्र लाग्ने पूर्वाचल वितरक चैतन्य बरालले जानकारी दिए ।
