दमक,२ फागुन/ आन्तरिक र वाहिरी पर्यटक या दमक आएका पाहुन जो कसैले पनि दमकमा खुल्ला पार्कको अभाव खड्किएको महसुस गरिरहेकै बेला प्रणय दिवसको अवसर पारेर दमक नगरपालिकाले ‘रोज गार्डेन पार्क’ शिलान्यास गरेको छ ।
दमक नगरपालिकाले वडा नं. ७ मा ‘रोज गार्डेन पार्क’ निर्माण गर्ने भएको छ । नगरपालिकाले आज बुधबार एक कार्यक्रमकाबीच पार्कको शिलान्यास गरेको हो ।
वडा नं. ७ रेडक्रस भवन अगाडीको खाली रहेको करीब ८ कट्ठा जमिनमा नगरपालिकाले पार्क बनाउन लागेको हो । पार्कको नगर प्रमुख रामनाथ ओली र उपप्रमुख गीता अधिकारीले संयुक्त रुपमा दुई वटा गुलाबको फूल रोपर शिलान्यास गरे ।
पार्क निर्माणमा नगरपालिकाले ४० लाख बढी लगानी गर्ने प्रशासकीय अधिकृत युवराज दाहालले बताए । उनका अनुसार एक बर्षभित्रमा निर्माण सम्पन्न गर्ने गरि तत्कालै निर्माण कार्य थालिनेछ ।
दाहालका अनुसार पार्कको डिजाइन तयार भइसकेको छ । व्यवस्थित पार्किङसहितको पार्कभित्र फरक फरक रंगमा फूल्ने १५ किसिमका गुलाबका फूल रोपिनेछन् । उनले पार्क बनेपछि युवापुस्ता र वृद्धवृद्धालाई रमाइलो गर्ने थलो बन्ने बताए । उनले भने,–‘ पार्कले नगरको सुन्दरता बढाउन पनि सहयोग पुग्ने छ ।’
दमक चोक नजिकै बनाउन लागिएकोले पार्कले बाह्य पर्यटक भित्र्याउन पनि सहयोग गर्ने नगरपालिकाको अपेक्षा छ । उनले बढ्दो घनत्व र शहरको सुन्दरतालाई बचाई राख्न पनि पार्क निर्माण थाल्नु परेको बताए । त्यस्तै उपप्रमुख अधिकारीले पार्क निर्माण सम्पन्न भएपछि नगरको गरिमा र चर्चा थप बढेर जानेमा आफू आशावादी रहेको बताइन् । पार्क निर्माण गर्न लागिएको स्थानमा तत्कालीन पञ्चायत सरकारले रजत जयन्ती मनाएको स्मारक रहेको छ । उक्त स्मारकलाई नभत्काई संरक्षण गरेर रोज पार्क निर्माण गरिने उपप्रमुख अधिकारीले बताईन् ।
