प्रदेश आवाज
दमक, २ फागुन/ झापाको दमक नगरपालिकाले स्थानीय राजपत्र जारी गरेको छ । स्थानीय सरकार ऐन २०७४ को दफा १०२ ले दिएको अधिकार प्रयोग गरि नगर कार्यपालिकाले दमक राजपत्र–२०७४ जारी गरेको हो । ९८ पृष्ठ भएको सो राजपत्र गत माघ ३ गते प्रकाशित गरिएको नगरपालिकाले जनाएको छ ।
दमक नगरपालिकाका प्रशासकीय अधिकृत युवराज दाहालका अनुसार जारी राजपत्र अनुसार नगरपालिकाले कार्य सञ्चालन गरिआएको छ ।
स्थानीय सरकार ऐनको प्रयोग गरि राजपत्र जारी गर्ने दमक प्रदेश नं. १ कै पहिलो नगरपालिका भएको प्रशासकीय अधिकृत दाहालको दावी छ । उनले नेपालको संविधानको अनुसूची ८, ९ मा उल्लेख भएका सूची अन्तर्गतका विषयमा तथा कानुन बमोजिम स्थानीय तहबाट निर्माण गरिएका कानुन,नियम,निर्देशिका ,कार्यविधि आदि राजपत्रबाट प्रकाशन गर्नुपर्ने व्यवस्था भए बमोजिम सो राजपत्र प्रकाशित गरिएको बताए । उनले जारी राजपत्रले स्थानीय सरकार सञ्चालनमा सहयोग पुग्ने बताए ।
राजपत्रले नगरका मूलभूत पाँच वटा विषयलाई कार्यविधि तयार गरि लागू गरेको छ ।
जारी राजपत्रमा नगरसभा सञ्चालन कार्यविधि –२०७४ ,भूमि व्यवस्थापन नियमावली –२०७४, दमक विपद व्यवस्थापन कोष निर्देशिका–२०७४,नगर कार्यपालिका ( कार्यसम्पादन नियमावली–२०७४ र नगर कार्यपालिका ( कार्यविभाजन नियमावली–२०७४ रहेका छन् ।
नगरसभा कार्यविधिको स्वीकृत गत कातिक ३० , भूमि व्यवस्थापनको पुस २८ , विपद व्यवस्थापनको कातिक ३० र कातिक ३० मा नै नगर कार्यपालिकाको कार्यसम्पादन र कार्यविभाजन नियमावलीलाई नगर कार्यपालिकाको बोर्ड बैठकले स्वीकृत गरेको थियो ।
राजपत्र प्रकाशनले नगरपालिकाबाट जारी हुने नियम, कानुन कार्यान्वयनमा ल्याउन सहज हुने नगर प्रमुख रोमनाथ ओलीले बताए । उनका अनुसार राजपत्रमा प्रकाशित भएका कार्यबिधि, नियमावली तथा निर्देशिका स्वतः कार्यान्वयन तहमा जानेछ ।
राजपत्र सामन्यतया ६–६ महिनामा प्रकाशन हुनेछ । विशेष परिस्थितिमा आवश्यकता अनुसार प्रकाशन गर्न सकिने नगरपालिकाले जनाएको छ ।
राजपत्रको सम्पादन अधिकृत दाहालले गरेका हुन् । उपप्रमुख गीता अधिकारी सल्लाहकार रहेको राजपत्रको संरक्षकको रुपमा नगर प्रमुख रहने राजपत्रमा उल्लेख छ ।
