दमक/ दमक शनिवार राती ३ वटा हात्ती गाउँ पसेपछि स्थानीय आतंकित भएका छन् । राती दमकको हाटखोला तथा नमूना मार्ग नजिक हात्ती प्रवेस गरेपछि भागदौड मच्चिएको थियो ।
स्थानीय शंकर रोक्का अनुसार हात्ती बस्तीमा प्रवेस गरेपछि स्थानीयहरु त्रसित भएका थिए । हात्तीले ठूलो क्षति नपुर्याएपनि एकजना भने गम्भिर घाइते गराएको छ ।
इलाका प्रहरी कार्यालय दमकका प्रमुख दीपक गिरीका अनुसार हात्ती बजारमा प्रवेस गरेपछि भागदौड हुदा नमूना मार्गमा रहेका सुरक्षा गार्ड ज्ञानबहादुर साँवा घाइते भएका हुन् । उनको लाइफलाइन अस्पतालमा उपचार गराइएको छ ।
सोही स्थानमा हात्तीले एक गाइलाई घाइते बनाएको छ । हात्तीको दाराले गाइको भूडिमा हानेको थियो । स्थानीय बंगाली दादाले पालेको गाइको आन्द्रा भूडि बाहिर निस्केको भएपनि पशु प्राविधिक आएर उपचार गरेको बताईएको छ । राती नै हात्तीहरु चुरेक्षेत्र चुलाचुलीतर्फ लखेटिएको प्रहरीले जनाएको छ ।
