इलाम/ इलाममा अब बिरामीले २५ गतेदेखि निःशुल्क स्वास्थ्य सेवा पाउने भएका छन् । इलाम नगरपालिकामा रहेको इलाम अस्पतालमा ज्येष्ठ, गरिब, असहायलगायतका बिरामीले २५ गतेदेखि अस्पतालबाट दिइने स्वास्थ्य सेवाहरु निःशुल्क पाउने भएका हुन् ।
इलाम अस्पतालमा सामाजिक सेवा इकाई स्थापना गरी चैत २५ गतेबाट सेवा सुरु गर्ने सामाजिक सेवा इकाई व्यवस्थापन समितिका प्रमुख बाचस्पति भट्टराईले बताउनुभयो । उहाँका अनुसार, आधारभुत र आकस्मिक स्वास्थ्य सेवा निःशुल्क पाउने हकबाट नागरिकलाई वञ्चित हुन नदिन यस्तो इकाई स्थापना गरिएको हो ।
इकाईबाट गरिब, असहाय, अपाङ्गता, ज्येष्ठ नागरिक, लैङ्गिक हिंसा प्रभावित, महिला स्वास्थ्य स्वयंसेविका, प्राकृतिक प्रकोपबाट प्रभावित व्यक्ति, शहीद परिवार, कुपोषित बालबालिका, प्रहरीबाट ल्याईएका थुनुवा, दुर्घटनामा परेका अभिभावक बिहीनलगायतका बिरामीले सेवामा छुट पाउने प्रमुख भट्टराईले जानकारी दिए ।
जिल्लाका १० स्थानीय तहकै नागरिकले सेवा प्राप्त गर्नेछन् । अत्यन्तै गरिब असहायलाई जिल्ला अस्पतालमा खान बस्न र जिल्ला बाहिरका अस्पतालमा रिफर गर्नुपरेमा अस्पतालसम्मका लागि एम्बुलेन्सको सेवासमेत निःशुल्क दिइने बताइएको छ ।
