झापा/ २३ औँ जनयुद्धको अवसरमा झापाको बिर्तामोडमा मंगलवारआयोजित कार्यक्रममा सहभागि वक्ताले नेपालमा गणतन्त्र स्थापनामा हुनमा जनयुद्धको मुख्य भूमिका रहेको बताएका छन् ।
माओवादी अध्ययन केन्द्रले आयोजना गरेको ‘दश बर्षे जनयुद्धका उपलब्धी’ बिषयक अन्तरक्रियाका सहभागिले नेपालमा गणतन्त्र, धर्मनिरपेक्षता, संघीयता, समानुपातिक सिद्धान्त लागु गराउन जनयुद्धको भूमिका रहेको बताए ।
अध्ययन केन्द्रका तर्फबाट पत्रकार तारामणि सापकोटाले ‘दश वर्षे जनयुद्धका उपलब्धी’ बिषयक कार्यपत्र प्रस्तुत गरेका थिए ।
कार्यपत्रमाथि एमाले नेता कुन्दन भट्टराई, नेपाली काँग्रेसका महाधिवेशन प्रतिनिधि तथा नेपाल प्रेस युनियन झापाका अध्यक्ष कृष्ण हुमागाई, जनमुक्ति सेनाका तत्कालिन व्रिगेडियर कमाण्डर श्यामबीर लिम्बु शौभाग्यले टिप्पणी तथा सुझाव राखेका थिए ।
कार्यक्रमका प्रमुख अतिथि प्रदेश सांसद पूर्णसिंह राजवंशीले जनयुद्धका परिवर्तनलाई संस्थागत गर्नु पर्नेमा जोडदिए । माओवादी अध्ययन केन्द्रका अध्यक्ष रमेश गुरागाईले नेपालको माओवादी जनयुद्ध विश्व कम्युनिष्ट आन्दोलनका लागि प्रेरणाको स्रोत बनेको बताए ।
सहभागिका तर्फबाट रिडर्स झापाका निरज कट्टेलले जनयुद्धको दुई अतिबाट मूल्याङ्कन हुने गरेको बताए ।
कार्यक्रम अध्ययन केन्द्रका डण्डिराज घिमिरेले संचालन गरेको कार्यक्रममा नेपाल रेडक्रस सोसाइटी झापाका सभापति लोकराज ढकालले जनयुद्ध गणतन्त्र स्थापनामा योगदान पूर्याएको कुरालाई सबैले स्वीकार गर्नु पर्ने बताए । कार्यक्रममा सहभागि भूपाल सापकोटा, अरुण श्रेष्ठ, देवी ओझा, चन्द्रकान्त ढकाल लगायतले जनयुद्धले गरेको सामाजिक तथा साँस्कृतिक परिवर्तनले निरन्तरता पाउन नसकेको बताए ।
