दमक,१ फागुन / नेपाल रेडक्रस सोसाईटी दमक उपशाखाको सभापतिमा प्रकाश बुढाथोकी चुनिएका छन् । आगामी ४ बर्से कार्यकालका लागि सभापतिमा बुढाथोकी सर्वसम्मत निर्वाचित भएका हुन् ।
नयाँ नेतृत्वका लागि सोमबार ३ जनाले उम्मेदवारी दर्ता गराएका थिए । सभापतिका लागि वर्तमान सभापति लीला गुरागाई, पूर्व सभापति प्रकाश बुढाथोकी र पूर्व उपसभापति नवलचन्द्र गुरागाईले उम्मेदवारी दर्ता गरेका थिए ।
सभापति पदका तीनै जना प्रतिष्पर्धीवीच सहमति जुटेपछि बुढाथोकी पुनः सभापतिमा निर्विरोध भएका हुन् । उनी वर्तमान सभापति गुरागाईको नेतृत्व अघि सभापति भएर एक कार्यकाल उपशाखाको नेतृत्व गरेका थिए ।
निर्वाचित भए लगत्तै सभापति बुढाथोकीले उपशाखाको थप बृद्धिविकासका लागि आफू क्रियाशील हुने बताएका छन् । उनले रेडक्रस उपशाखालाई अव सामुदायिक अस्पतालका रुपमा विकास गर्ने लक्ष्य राखिएको बताए ।
यता उपशाखाका ८ सदस्य पदमा भने २१ जनाले आफनो उम्मेदवारी दर्ता गराएका निर्वाचन अधिकृत समेत रहेका रेडक्रस झापा शाखाका उपसभापति मित्रदेव काफ्लेले जानकारी दिए ।
सदस्यमा समेत निर्वाचनको मिति अगावै सहमती जुट्ने निर्वाचित सभापति बुढाथोकीले जनाए । सहमति नजुटे आगामी फागुन ५ गते निर्वाचन कार्यक्रम रहेको छ ।
