दमक/ नेकपा एमालेले झापाको क्षेत्र नं ५ मा आसन्न निर्वाचनलाई लक्षित गर्दै सञ्चालन गरेको पहिलो चरणको घरदैलो तथा आन्तरिक चुनावी तयारी सकेको छ ।
सो पार्टीले विभिन्न १६ स्थानमा चुनावका लागि अन्तरिक तयारी स्वरुप कार्यकर्ताहरुलाई अभिमुखीकरण तथा परिचयात्मक भेला, कार्यक्रमहरु बुधबार सम्म लगाएर सम्पन्न गरेको हो ।
पार्टीले बिहिबारदेखि मौन अवधि शुरु नभइञ्जेल सम्म भन्ने खुल्ला प्रचार प्रसार अन्तर्गत निर्वाचन क्षेत्र अन्तर्गतका २९ वटै वडामा एकैसाथ दोश्रो चरणको चुनाव प्रचार प्रसारसहित मत माग्ने कार्यक्रमलाई अघि बढाउने दमकमा पत्रकार सम्मेलन गरी जनाएको छ ।
क्षेत्र नं ५ का निर्वाचन परिचालन कमिटी संयोजक तथा पार्टीका पोलिटब्यूरो सदस्य देवेन्द्र दाहालले निर्वाचनको लागि प्रचार प्रसारसंगै सत्तापक्षीय गठबन्धनले राज्यस्रोतको दुरुपयोग गर्न सक्ने सम्भावनाको समेत ख्याल राख्दै खबरदारी पनि गरिने बताए । उनले एक बुथ २०० युथको तयारी समेत गरेको जनाए ।
दाहालले पार्टी अध्यक्ष एवं पूर्व प्रधानमन्त्री केपी शर्मा ओली आफैं चुनावी प्रतिस्पर्धामा रहेको यो क्षेत्रमा आफनो पार्टीले ६५ प्रतिशत मत ल्याउने रिपोटिङ पार्टीमा आएको दाबी गरे ।
दाहालले भने– गठबन्धनका उम्मेदवारको भन्दा अध्यक्ष ओलीले ४० हजार बढी मत ल्याएर चुनाव जित्ने रिपोटिङ आएको छ , देशभरको चुनावी परिणाम एमालेको बहुमतको सरकार बन्छ । २०४८ साल यता निरन्तर रुपमा यो क्षेत्रमा चुनाव लडदै आएका ओलीले एकपटकको निर्वाचनमा पराजय ब्यहोर्नु परेपनि सबै निर्वाचन जित्दै आएको तर्क गर्दै दाहालले यहाँ विशेष गरी दमकमा भएको बिकास र राष्ट्रिय अन्तराष्ट्रिय जगतमा बढेको ओलीको उचाईले यसपटक अघिल्ला निर्वाचन भन्दा धेरै मतान्तरले निर्वाचन जित्ने एमाले नेताहरुको दाबी छ ।
पत्रकार सम्मेलनमा पार्टीका केन्द्रिय सदस्य रोमनाथ ओली, प्रदेश कमिटी सदस्य इन्द्र भण्डारी, जिल्ला अध्यक्ष दिपक कार्की, क्षेत्रीय संयोजक तुलसी कार्की, क्षेत्रीय चुनाव प्रचार प्रसार समिति संयोजक अम्बिका खनाल लगायतको उपस्थिती रहेको थियो ।
आमसभा निश्चित छैन– पार्टी अध्यक्ष एवं यस क्षेत्रका प्रत्यक्ष तर्फका उम्मेदवार ओली चुनावी दौडाहामा देशैभर विभिन्न कार्यक्रमहरुमा पुग्ने भएकाले एमालेले तत्काल अध्यक्ष ओलीको उपस्थितीमा हुने कार्यक्रमको तय भइनसकेको जनाएको छ । यो क्षेत्रमा चुनावी आमसभाको कार्यक्रम तय भइसकेको छैन– पोलिटब्यूरो सदस्य दाहालले भने– आवश्यकता अनुसार आमसभाको तय भएको अवस्थामा उहाँ (पार्टी अध्यक्ष ओली) आउन सक्नु हुन्छ । उनका अनुसार १८ कार्तिकदेखि अध्यक्ष ओलीले दार्चुलाबाट देशव्यापी चुनावी दौडाहा शुरु गर्नेछन ।
