दमक/ प्रतिनिधिसभा सदस्यमा नेपाली कांग्रेसबाट सांसद बनेकी झापा, दमक– ९ निवासी महेन्द्र कुमारी लिम्बुलाई यातायात मजदुरहरुले बधाईसहित सम्मान गरेको छ ।
नेपाल यातायात मजदुर संघ हलुका सवारी चालक दमक नगर समितिले विहिबार विहान आफनै कार्यालयमा एक कार्यक्रम गरि सांसद सुब्बालाई बधाई शुभकामनासहित सम्मान गरेको हो । सांसद सुब्बा नेपाली कांग्रेसबाट समानुपातिक कोटाबाट निर्वाचित भएकी हुन् ।
त्यस अवसरमा संघले उनीसहित अन्य तीन जना यातायात मजदुरका अग्रजलाई समेत सम्मान गरेको थियो ।
यसरी सम्मानीत हुनेमा नेपाल यातायात मजदुर संघ झापाका नवनिर्वाचित अध्यक्ष विश्वास कुमार कास्यप,वरिष्ठ उपाध्यक्ष बालकृष्ण श्रेष्ठ र पूर्वाञ्चल यातायात व्यवसायी संघ झापाका नवनिर्वाचित अध्यक्ष गंगाप्रसाद सिटौला छन् । यसैगरि संघले इलाका ट्राफिक प्रहरी कार्यालयमा आएका प्रहरी नायव निरिक्षक विनोदकुमार खतिवडालाई समेत खादा ओढाएर स्वागत गरेको थियो । कार्यक्रममा सांसद सुब्बा, यातायात मजदुर संघका जिल्ला अध्यक्ष कास्यपले मजदुरहरुको पेशागत हितका बारेमा बोलेका थिए ।
संघका अध्यक्ष गौतम लामाको अध्यक्षतामा भएको सो सम्मान कार्यक्रममा कांग्रेस महिला नेतृ रेगिना भट्टराई, नेपाल प्रेस यूनियनका जिल्ला सचिव गिरिराज भट्टराई, यातायात मजदुरहरुको उपस्थिति रहेको थियो । कार्यक्रममा संघका उपाध्यक्ष महेन्द्र अधिकारीले स्वागत मन्तव्य राखेका थिए भने सञ्चालन सचिव गणेश गौतमले गरेका थिए ।
