मोरङ/ लगानी र मिहिनेत गर्दा खोलाको बगरलाई पनि आन्तरिक पर्यटनको आकर्षक गन्तव्य बनाउन सकिन्छ भन्ने उदाहरण मोरङका दुई रिर्सोटले प्रस्तुत गरेका छन् । मानव बस्तिभन्दा पर सुनसान खोला किनारामा दैनिक हजारौं मानिस ल्याउन सकिन्छ भन्ने आत्मविश्वासले सुरु भएको सपना विस्तारै साकार हुँदै गएकोमा गोकुलम रिसोर्टका संचालकहरु प्रसन्न छन् ।
मोरङको सुन्दर हरैंचानगरपालिका र सुनसरीको इटहरी उपमहानगरपालिकाको सिमानामा रहेको बुढीखोला नजिकैको बगर क्षेत्र यतिबेला बालबालिकाका लागि मात्र होइन युगल जोडी र अभिभावकको पनि एउटा राम्रो गन्तव्य बनेको छ । विराटनगरदेखि धरानसम्म बसोवास क्षेत्रको दु्रत विकाससंगै शहरीकरणको वृद्धि भएपनि बालबालिकाका लागि उपयुक्त फनपार्कको अभाव छ । त्यहि अभाव पुर्ती गर्न फनपार्क सहितको मनोरम गन्तव्य बनाउने प्रयास गोकुलम रिसोर्टले गरेको देखिन्छ ।
फुर्सदको समयमा रमाइलो गर्ने र घुम्नका लागि नजिकको गन्तव्य खोजिरहेकाहरुका लागि यो एउटा गन्तव्य स्थलको रुपमा विकास भइरहेको रिसोर्टका व्यवस्थापक कमल लम्सालले बताए । रिसोर्टमा कृत्रिम कलाकृतीहरुको बाहुल्यता छ ।
पानीजाहाज लजदेखि धरहरासम्म, ताजमहलदेखि हात्तिसार सम्मका कृत्रिम संरचनाले बालबालिकालाई आकर्षित गरिरहेको छ । अष्ट्रिच, टर्की जस्ता चराचुरुङ्गी र मरुभूमिमा रमाउने उँट रिसोर्टको आकर्षक बस्तु बनेको छ । संगै रिसोर्टमा रोटेपिङलगायत रमाउने धेरै बस्तु राखिएक छन् । अव पोखरी भित्रै सेमिनार हल निर्माणको काम सुरु भएको लम्सालले बताए । रिव १५ करोडको लगानीमा निर्माणाधिन रिसोर्ट छ विगाह क्षेत्रफलमा फैलिएको छ । केही भूभाग पिकनिक स्पोर्टको लागि राखिएको छ ।
दैनिक ५ सयको हाराहारीमा आगन्तुकहरु आउने रिसोर्टमा बिदाको दिन १५ सयदेखि २ हजार जनासम्म घुम्न आउने गरेको व्यवस्थापक लम्सालले जानकारी दिए । तराईमा यो वर्षको साउन २८ गते आएको बाढिबाट रिसोर्टले ठूलो क्षतिव्यहोरेको थियो । त्यसको पुनर्निर्माणमा करिव ४ करोड खर्च भएको बताइएको छ ।
