काठमाडौं / नेकपा एमाले र माओवादी केन्द्रका अध्यक्षले एकताका लागि गरेका सहमति पार्टीमा अनुमोदन भएका छन । एमाले स्थायी समिति बैठकले दुई अध्यक्षबीच भएका सहमति अनुमोदन गर्दै अध्यक्ष केपी ओलीलाई प्रधानमन्त्रीका रुपमा अघि सार्ने निर्णय गरेको छ । ललितपुरमा बसेको बैठकमा अध्यक्ष ओलीले माओवादी केन्द्रका अध्यक्षसँग अहिलेसम्म भएका सहमतिबारे जानकारी गराएका थिए ।
बैठकले दुई अध्यक्षबीच भएका सहमति अनुमोदन गरेको सो पार्टीका स्थायी समिति सदस्य सुभाष नेम्वाङले जानकारी दिए । एमालेले माओवादीको समर्थनमा अध्यक्ष ओलीको नेतृत्वमा नयाँ सरकार गठनका लागि दावी गर्ने औपचारिक निर्णय पनि गरेको छ । निर्वाचन आयोगले राष्ट्रपतिलाई परिणाम बुझाएलगत्तै सरकार गठनको दावी गर्ने सो पार्टीको तयारी छ । यता माओवादी केन्द्रका शिर्षस्थ नेताको बैठकले पनि सहमति अनुमोदन गर्दै थप निर्णय गर्ने अधिकार अध्यक्ष प्रचण्डलाई दिएको छ ।
बैठकमा अध्यक्ष प्रचण्डले एकीकृत पार्टी र सरकारको नेतृत्व दुबै नेताले गर्ने लगायतका सहमति भएको जानकारी गराएका थिए । एमाले अध्यक्ष ओली र माओवादी केन्द्रका अध्यक्ष प्रचण्डबीच भएको छलफल लगत्तै दुबै पार्टी आन्तरिक छलफलमा जुटेका थिए । आन्तरिक छलफलपछि पार्टी एकता संयोजन समितिको बैठक बसेको छ । सोही बैठकले सहमतिको खाकालाई अन्तिम रुप दिनेछ ।
दुई अध्यक्षबीच भएका सहमति
द्विअध्याक्ष्मत्मक प्रणाली अनुसार दुवै पार्टीका अध्यक्ष केपी शर्मा ओली र पुष्पकमल दाहाल प्रचण्ड समान हैसियतमा रहने ।
पार्टी चलाउने भएकाले प्रचण्ड कार्यकारी, ओली सेरेमोनियल अध्यक्ष, सरकारको नेतृत्व ।अध्यक्ष र प्रधानमन्त्रीको जिम्मेवारी साटफेर, वाम गठवन्धन निमार्णताकाकै सहमति अनुसार ५ वर्षे कार्यकालमा दुवै आधा–आधा प्रधानमन्त्री ।
दुवैले पुच्छर हटाएर पार्टीको नाम नेपाल कम्युनिष्ट पार्टी राख्ने ।
दुवैले मानिरहेका माक्र्सवाद, लेनिनवादलाई पार्टीको सैद्धान्तिक आधार मान्ने ।
सकेसम्म छिटो बिशेष महाधिवेशन गर्ने ।
त्यसअघि एकताका शैद्धान्तिक आधार र संगठनात्मक संरचनाबारे गृहकार्य गर्न दुई कार्यदल बनाउने ।
दुई अध्यक्षसँगै बहुपद सृजना नगर्ने ।
सानो आकारको केन्द्रीय समिति बनाउने ।
राष्ट्रपति र उपसभामुख एमालेलाई, उपराष्ट्रपति र सभामुख माओवादीलाई ।
