कांग्रेस दमकको सचिवका सशक्त उम्मेदवार प्राध्यापक रामचन्द्र अधिकारी

नेपाली कांग्रेसको आसन्न १४ औं महाधिवेशन अन्तर्गत हुने दमक नगर अधिवेशनमा चुनावी मैदानमा होमिएका तीन वटा प्यानल मध्ये पर्शुराम रिजाल नेतृत्वको टिमबाट नगर सचिवका रुपमा उम्मेदवारीको घोषणा गरेका सशक्त र प्रभावशाली उम्मेदवार हुन रामचन्द्र अधिकारी ( आरसी) दमकको २ नम्बर वडाका स्थायीबासिन्दा युवा नेतृत्व अधिकारी शैक्षिक/ प्राज्ञिक व्यक्तित्व हुन ।

सुझबुझसहितको राजनीतिका लागि नेतृत्वमा शैक्षिक योग्यताको बहस चलिरहँदा एक दशक अघिनै स्नातकोत्तर गरिसकेका अधिकारीकोे उम्मेदवारीले धेरै आशा जगाएको छ । उनले नर्थ बंगाल विश्व बिद्यालयबाट बीबीए र त्रिभुवन विश्व बिद्यालयबाट एमबीएस सम्मको अध्ययन पूरा गरिसकेका छन ।

उनी चुनावी मैदानमा होमिदै गर्दा आफूलाई पार्टीको एउटा सच्चा सिपाहीका रुपमा मात्रै परिचित गराउन चाहन्छन । अधिकारी भन्छन– मेरो शैक्षिक योग्यताको बिषय नै प्रमुख हुनुपर्छ भन्नेमा त म छैन , प्रतिनिधि मतदाता र यहाँका अग्रज नेताहरुले त्यसलाई आधार बनाउनु भएको अवस्थामा मैंले धेरै नेता कार्यकर्ताको मन जितेको अनुभूति गर्नेछु ।

मलाई यो पार्टी अधिवेशन विशुद्ध आन्तरिक मामिला भएका कारण यसमा कसैको जय वा कसैको पराजय हुन्छ जस्तो लाग्दैन । हामी सबैले अर्थात सिंगो कांग्रेसले जित्ने अधिवेशन हुनेछ भन्नेमा म विश्वस्त छु – अधिकारी भन्छन । यसमा कसैले यो वा त्यो गुटका नाममा हिलो छयापाछयाप गर्न नहुने उनको बुझाई छ । सर्वसम्मत नेतृत्व चयनको प्रयास दमकमा आवश्यक भएको धारणा राख्ने उनी नेतृत्वले त्यो कसरत अझै पनि गर्न सक्ने धारणा राख्छन । सर्वसम्मतको प्रयास अझै पनि जारी छ त्यसो हुन नसकेको अवस्थामा पनि स्वस्थ प्रतिस्पर्धा हुनेछ र हुनुपर्छ – अधिकारी भन्छन ।

राजनीतिक रुपमा शंकरदेव बहुमुखी क्याम्पस काठमाडौं पढदै गर्दा नेविसंघबाट संगठित भएका अधिकारीले त्यहाँ संगठनको नेतृत्व समेत सम्हाले । अध्ययनका सिलसिलामा उनले दुई वटा क्याम्पसमा नेविसंघको इकाई सभापतिको जिम्मेवारी सम्हालिसकेका छन । सामाजिक रुपमा समेत उनी आफैंले आधारभुत शिक्षा हासिल गरेको ढुकुरपानी माविको भूपू बिद्यार्थीहरुको संस्थामा ढुुकुरपानी पूर्व बिद्यार्थी समाजका अध्यक्ष रहेका छन ।

स्थानीय खेलकुद तथा सामाजिक गतिबिधिहरुमा समेत आफूलाई सक्रिय बनाउँदै रोयल स्पोर्टिङ क्लबको अध्यक्ष समेत रहेका अधिकारी गत स्थानीय तहको निर्वाचनमा वडामा उम्मेदवार बनेर झिनो मतान्तरले पराजित भएका थिए । सिंगो नगरमा नेपाली कांग्रेसले निर्वाचन जित्न नसकिरहेका बेला उनले चुनावी हारलाई पनि सहजरुपमा लिएको उनको भनाई छ ।

फेसबूकमा कमेन्ट्स गर्नुहोस्