दमक/ दमकमा शुक्रबार दिउँसो प्रहरी र विद्यार्थीबीच झडप भएको छ । यातायात मजदुरले गाडीमा चढ्न नदिएको तथा दुव्र्यवहार गरेको भन्दै विरोधमा उत्रिएका दमक बहुमुखी क्याम्पसका विद्यार्थी र प्रहरीबीच झडप भएको हो । झडपका क्रममा विद्यार्थीको ढुंगा प्रहारबाट केही गाडीमा क्षति पुगेको थियो ।
सरकारले दिएको छुटअनुसार यातायात मजदुरले विद्यार्थीलाई गाडीमा चढ्न नदिएपछि क्याम्पस पढ्न गाह्रो भएको भन्दै विद्यार्थीहरु आन्दोलित बनेका हुन् । गत चैत २३ गते स्वतन्त्र विद्यार्थी युनियन, यातायात व्यवसायी र प्रहरीबीच सरकारी छुटअनुसार ४५ प्रतिशत सहुलियतमा विद्यार्थीलाई गाडीमा चढ्न दिने सहमति जुटेको थियो । तर, मे १ ख २४६६, मे १ ख २१५७, बा ५ ख २१४९ र मे १ ख ५८५६ नम्बरको बसले विद्यार्थी चढाउन नमाने भन्दै विद्यार्थीहरु आन्दोलित बनेका हुन् ।

उनीहरुले सहमति पालन नगरेको भन्दै इलाका प्रहरी कार्यालयका प्रहरी नायव उपरीक्षक दीपक गिरीको ध्यानाकर्षण गराएका थिए । डीएसपीको ध्यानाकर्षण गराएपनि सुनुवाई नभएको भन्दै विद्यार्थीहरु सडकमा उत्रिएर चक्काजाम गराएका थिए ।
विद्यार्थीहरुले सडक अवरुद्ध गरेपछि दिउँसो १ देखि ३ बजेसम्म पूर्व–पश्चिम राजमार्ग ठप्प भएको थियो ।

विद्यार्थीले चक्काजाम खोल्न नमानेपछि प्रहरीले बल प्रयोग गरेर सडक खुलाएको थियो । साँझ सरोकारवाला, विद्यार्थी र प्रशासनविच सहमती भएपछि आन्दोलन रोकिएको छ । विद्यार्थीलाई सवै साझा सवारीले चढ्ने बातावरण मिलाउने जिम्मा प्रशासनले लिने भएपछि आन्दोलन फिर्ता भएको हो ।

दमक,२९ चैत/ झापाको कमल गाँउपालिका–५ स्थित आदिवासी रंगशाला तथा स्मृति प्रतिष्ठानको अध्यक्षमा हुकुमसिंह राई चुनिएका छन् । विहिबार सम्पन्न प्रथम अधिबेशनको बन्द सत्रले राईको अध्यक्षतामा १५ सदस्यीय कार्यसमिति चुनिएको हो ।
सर्वसम्मत गठित समितिको उपाध्यक्षमा दमक जवेगु,महासचिवमा दिपेनवाला राई,सचिवमा सुसन राई र कोषाध्यक्षमा विष्णु भट्टराई चुनिएका छन् ।

यसैगरि सदस्यहरुमा मनकुमारी बेघा,जीतबहादुर राई,भीमराज राई,चन्द्रकला सुब्बा, भोजकुमार राई ,चन्द्रप्रसाद ताजपुरिया,पाण्डव माँझी,सन्तकुमार कार्की ( सन्तोष ) हरिदेवी राई र दिपक न्यौपाने चुनिएको गठित निर्वाचन समितिका संयोजक अधिबक्ता विमल संग्रौलाले जानकारी दिए । निर्वाचित समितिलाई विहिबारनै प्रमाणपत्र समेत वितरण गरिएको थियो ।

विराटनगर/ संघीय मामिला तथा सामान्य प्रशासनमन्त्री लालबाबु पण्डितले सचिवहरुको सरुवामा कसैले चित्त दुखाउन नहुने बताएका छन्। विराटनगर विमानस्थलमा मंगलबार सञ्चारकर्मीसँग कुरा गर्दै सामान्य प्रशासनमन्त्री पण्डितले सचिव सरुवामा पनि यो मेरो त्यो मेरो भन्न नहुने बताएका हुन् ।

माओवादी केन्द्रबाट सरकारमा प्रतिनिधित्व गर्ने मन्त्रीहरुले आफूहरुको सहमतिविपरीत प्रधानमन्त्रीले एकलौटी ढंगले सचिव सरुवा गरेको भन्दै असन्तुष्टि जनाएको सार्वजनिक भएको थियो ।

मन्त्रालयका सचिवको सरुवा प्रधानमन्त्रीसँग आवश्यक छलफल गरेर गरिएको हो,’ पण्डितले भने, ‘प्रधानमन्त्रीय सिस्टममा यो मेरो त्यो मेरो भनेर चित्त दुखाउनु हुँदैन।’ पण्डितले सरकारले गरेको निर्णय कसैले भन्दैमा पुनर्विचार नहुने बताए । ‘मन्त्रिपरिषद्ले निर्णय गरेर मन्त्रालयका सचिवहरु सम्बन्धित काममा गइसक्नुभएको छ,’ पण्डितले भने, ‘अब निर्णय पुनर्विचार हुँदैन।’ कर्मचारीलाई स्वैच्छिक अवकाश दिँदैनौँ अर्को प्रसंगमा मन्त्री पण्डितले कर्मचारीले स्वैच्छिक अवकाश अधिकारको रुपमा मात्रै बुझेर नहुने बताए ।

खटाइएको ठाउँमा जानुपर्ने बताउँदै पण्डितले स्वैच्छिक अवकाश दिने नदिने विषयमा सरकारको निर्णय महत्वपूर्ण भएको बताए । ‘स्वैच्छिक अवकाशलाई अधिकारको रुपमा मात्रै बुझेर हुँदैन,’ पण्डितले भने, ‘सरकारले निर्णय गरेको खण्डमा स्वैच्छिक अवकाश दिइनेछ भन्ने कानुनमै उल्लेख छ, सरकारले अहिलेलाई स्वैच्छिक अवकाशका लागि परेको निवेदनलाई स्थगित गर्ने निर्णय गरेको छ ।’ सरकारले अर्को निर्णय नगरेसम्मका लागि अवकाश नदिइने उनको भनाइ छ ।

यसैगरी, काममा नजाने कर्मचारीको विवरण मागिएको र अन्यत्र हाजिरी गर्न नदिइने गरी सम्बन्धित मन्त्रालय तथा कार्यालयमा परिपत्र गरिसकिएको पण्डितले जानकारी दिए । ‘हामीले यसअघि पनि सम्बन्धित मन्त्रालय र कार्यालयहरुमा खटाएको ठाउँमा नजाने कर्मचारीलाई हाजिर गर्न नदिनु भन्ने परिपत्र गरिसकेका छौं,’ उनले भने, ‘हाजिर गराएको सूचना आएकोले फेरि हिजो मात्रै परिपत्र गरेका छौँ, अब पनि हाजिर गराएको थाहा पाए, सम्बन्धित कार्यालयका प्रमुखलाई नै कारबाही गर्छौं।’खटिएको ठाउँमा कर्मचारी पठाउने र जाने क्रम सकिएपछि कर्मचारी समायोजन प्रक्रिया सुरु हुने पण्डितको भनाइ छ।

दमक/ दमक स्थित मारवाडी सेवा समितिको दशौं साधारण सभा सम्पन्न भएको छ । नव गठित समितिमा अध्यक्ष भरत अग्रवाल चयन भएका छन् ।
यसैगरी उपाध्यक्षमा मुकेश अग्रवाल, सचिव मनोज अग्रवाल, सह–सचिव पवन गवडीया, कोषाध्यक्ष गोविन्द अग्रवाल चुनिएका छन् ।

यसैगरी नव गडित समितिमा सदस्यहरु क्रमशः अमित अग्रवाल, संजय मोठ, रोशन अग्रवाल, सुन्दर अग्रवाल, राजेश अग्रवाल, इश्वर चन्द नक्किपुरिया र रमेश जिन्दल रहेका छन् भने नि वर्तमान अध्यक्षलाई दिनेश अग्रवाललाई समेत सदस्यमा राखिएको छ ।